A Silver Jubilee of Faith

Gisaulog sa makasaysayanong paagi ang ika-25 nga Parochial Fiesta sa San Francisco de Asis Parish, Barangay Tagakpan, Davao City. Sulod sa napulo ka adlaw nga selebrasyon, gikan Septembre 25 hangtod Oktubre 4, 2024, naghiusa ang mga parokyano sa nagkalain-laing kalihokan nga nagpakita sa ilang pagtuo ug debosyon kang San Francisco de Asis.

Ang mga kalihokan nga gihimo sa parokya ubos sa pagpangulo ni Rev. Fr. Mario Holmina, OSJ ug Rev. Fr. Jose Dennis Venus, OSJ, kauban ang mga Pangulo sa Katilingban (PSK) ug sa tanang mga deboto, naglakip sa adlaw-adlaw nga Nobena, mga Santos nga Misa, concert for a cause, floral float parade, drum and lyre contest, coronation, ug uban pa.

Ang kinapungkongan sa selebrasyon mao ang Santos nga Misa nga gipangulohan ni Most. Rev. Romulo G. Valles, DD., Arsobispo sa Davao. Sa iyang homiliya, gipahinumdoman ni Arsobispo Valles ang mga parokyano sa kinabuhi ug mga pagtulon-an ni San Francisco de Assis, nga gihulagway niya nga usa ka “extraordinary model nga kita makasubay sa dalan ngadto sa kinabuhing walay katapusan.”

Human sa misa, gisundan kini sa usa ka salo-salo matag sona. Ang mga nagkadaiyang kalihokan sama sa Indak-Indak sa Kadalanan ug Gabi ng Parangal naghatag og dugang kalipay sa mga nagtambong.

Ang ika-25 nga Parokya Fiesta sa San Francisco de Assis nagdala og usa ka importanteng mensahe: ang pagpasalamat sa mga panalangin nga nadawat ug ang paglaom sa mga bag-ong sinugdanan. Hinaut nga si San Francisco mahimong usa ka suga nga magdan-ag sa mga kinabuhi sa mga parokyano ug magpadayon sa pag-inspirar sa mga tawo sa pagbuhat og maayo. (Bay Jay Teon)