Viva Nuestra Señora De Kasilak

“Imo man kami Señora, sa mga grasya mo, pun-a kami.”

“Birhen sa Kasilak, Rayna sa langit, imong ulipon, dad-a kami.”

“Patrona namo, among dalangpan, imong ulipon, ig-ampo mo kami.”

Pipila lamang kini sa mga gutlo sa pag-ampo sa mga deboto ni Santa Maria Birhen sa Kasilak sa Kapilya sa GKK Birhen Sa Kasilak nga nahimutang sa Purok 1, Barangay Kasilak, Dakbayan sa Panabo probinsya sa Davao del Norte.

Niadtong Septembre 24, 2024 mao ang ika-72 nga kapistahan sa Birhen Sa Kasilak – Panabo uban sa Tema: BIRHEN SA KASILAK, SUMBANAN SA SINODONG PANAW SA SIMBAHAN, DIHA SA IYANG PAGKAMASINUGTANON SA KABUBUT-ON SA AMAHAN. Sa pagpangandam sa ilang kapistahan, gi-ablihan kaniadtong Septembre 15 ang unang adlaw sa Novena pinaagi sa usa ka Santos nga Misa pinangulohan sa ilang Kura Paroko Reberendo Padre Dioscoro Saniel, kon “Father Lord” ug nahuman ang siyam ka novena niadtong Septembre 23, 2024.

Giselebrar ang ika-72 nga katuigan pinaagi sa Santos nga Misa, gihimo sa alas 9:30 ang takna sa kabuntagon sa panguna ni Fr. Saniel. Sa homiliya, iyang gipaambit nga ang gugma ug gingharian sa Dios walay pinili, dili kini eksklusibo apan alang sa tanan. Ang Ebanghelyo siya nagpadayag nga ang gugma sa Dios dili relasyon sa dugo apan alang kini sa kinatibuk-ang banay ug pamilya nga nagtuman, namati, mitoo ug misunod sa kabubut-on sa Dios Amahan. Ang kabahin sa pamilya ug banay ni Kristo nagsugod diha sa pagkabinunyagan ug sakop sa simabahan. Diha sa atong pagka-Kristiyanos, ato bang nabuhat ang mga kwalipikasyon nga kita sakop nining maong banay? Aktibo ba kita diha sa atong GKK o Simbahan, nagasimba ba kita ug ato bang napuy-an ang iyang mga sugo ug nabuhat ang atong obligasyon isip piniyalan? Ang giingon ni Jesus diha sa ebanghelyo karon, ang namati sa Pulong sa Dios ug nagtuman niini susama kang Santa Maria nga iyang inahan ug kita isip Kristiyanos. Bisan lisod ang pagtuman sa kabubut-on sa Dios labi na sa iyang kasugoan mabati unta nato ang sumbanan sa iyang mahal nga inahan.

Usahay makaingon kita nga insakto ang atong panghuna-huna ug pagbati apan ang motibo niini dili haom sa kasuguan sa Dios. The morale principle: THE END DOES NOT JUSTIFY THE MEANS. Very challenging gayud ang pagsunod sa kabubut-on sa Dios. Sama unta kita ni Maria ang tinood nga inahan ni Jesus diha sa iyang pagtuman sa kabubut-on ug sa iyang pagpamati sa Pulong sa Dios ug pagpuyo niini. Ug pinaagi sa atong Salmo, kita gipahinumduman pag-ingon: AGAKA AKO GINOO DIHA SA DALAN SA IMONG KASUGUAN.

Human sa Santos nga Misa gisunod usab ang pagbunyag sa upat ka mga kabataan kauban ang ilang ginikanan nga buot magpasakop sa Kristohanong banay ni Kristo Jesus.

Mapasalamaton ang tanang mga GSL’s ug miyembro sa GKK Birhen Sa Kasilak sa kalampusan ug kasadya sa ilang tinuig nga kapistahan uban sa mga bisita nga mga deboto ni Santa Maria Birhen Sa Kasilak nga gikan sa nagkalain-laing lugar, ingon man sa mga donasyon nga ilang nadawat gikan sa ilang mga miyembro nga manggihatagon ug sa ilang pagtinabangay sa pagpangandam lakip sa adlaw sa ilang kapistahan. Mapasalamaton usab sila sa Barangay Kasilak Officials sa suporta nga ilang nadawat, mga mission partners ug mga individual ug limilihok sa maong Gagmayng Kristohanong Katilingban ug sa ilang Kura Paroko Fr. Lord, nga naga giya kanila.

Dalaygon ang DIOS. Viva Marial Viva Jesus!

(By Arsenio H. Berdera Jr. | GKK SoCCom SMPRP Buhangin)