Testimonya sa Pagtoo

Davao City, Agosto 17, 2024 – Ang Sakramento sa Kompirma gipahigayon alang sa 365 ka mga kandidato sa Our Lady of Miraculous Medal Parish sa Indangan, Davao City, sa usa ka hapsay nga seremonya nga gipangulohan ni Most Reverend Romulo Valles, D.D., Arsobispo sa Davao. Ang seremonya nagsugod alas-9:00 sa buntag pinaagi sa Liturhiya sa Pulong ug Ritwal sa Kumpirma. Natapos kining maong kalihukan sa alas-onse sa buntag.

Ang kadaghanan mga kandidato nag-gikan sa mga Grade 6 nga mga estudyante sa Acacia Elementary School ug Teofilo Fernandez Elementary School. Sila mi-agi’g usa ka hugot nga preparasyon, nga naglakip sa pagpasar sa ilang mga sertipiko sa bunyag ug pagtambong sa seminar nga gihimo niadtong Agosto 10, 2024. Ang seminar, nga gipasiugdahan sa Ministriya sa Pangulo sa Pagpanudlo kon PSP. Sila nagsiguro nga andam ang mga kandidato nga madawat ang sakramento.

Ang maong kalihokan nagtimaan sa dakong panghitabo sa espirituhanong kinabuhi sa mga batan-ong mga kumpirmante, nga karon andam na nga mopa-ambit sa ilang pagtoo isip kabahin sa Katoliko nga Simbahan. Gipasabot ni Arsobispo Valles ang kahinungdanon sa papel sa Espiritu Santo sa paggiya sa ilang pagtoo samtang sila nagpadayon sa ilang espirituhanong panaw.

Ang komunidad sa parokya, nga gipangulohan ni Fr. Jesus H. Samaniego, nagpasalamat kang Arsobispo Valles ug sa PSP Ministry tungod sa ilang paningkamot nga nahimong malampuson ang maong kalihokan. Ang seremonya usa ka pahinumdom sa padayon nga papel sa mga sakramento sa kinabuhi sa Simbahan ug sa mga sakop niini. (Marilou Luzon)