Panaglahi Dili Babag sa Kahiusahan

Ika-26 nga Domingo sa Ordinaryong Panahon (September 29, 2024)
Num 11:25-29 / Ps 19:8, 10, 12-13, 14 / Jas 5:1-6 / Mk 9:38-43, 45, 47-48

Karong adlawa, ang Ebanghelyo ni San Marcos nagpadayag nga si kinsa kadtong nagbuhat og dagkong mga butang sa ngalan ni Jesucristo dili makahimo sa paghimaraot ug pagpasipala kaniya. Atong hinumdoman nga ang paghimo og mga katingalahang mga butang sa ngalan sa atong Ginoo kini nakasukad sa pag-ila gayod kaniya. Apan ang pag-ila sa Ginoo dili lamang kutob sa atong hunahuna o diha sa ideya apan kini nagalangkob diha sa kinatibuk-ang pagkatawo nato. Maka-ingon kita nga nakaila kita sa Ginoo pinaagi sa atong dakong pagtoo Kaniya kon kita mihimo sa buhat sa Ginoo nga mao ang mapadayonong buhat sa kaluwasan. Kon atong pamalandongan ang reyalidad sa mga demonyo sila nakaila pag-ayo sa Ginoo, apan ang maong kahibalo wala maghatod kanila sa paghimo sa mga buhat nga Diyosnon. Ang ilang pag-ila sa Diyos wala maghatod kanila sa pagsimba kaniya labaw sa tanan. Naghimo hinoon sila sa mga buhat nga sukwahi sa pagtulon-an sa Diyos. Dili lamang kita kutob sa pag-ila Kaniya apan mohatod kanato sa pagbuhat sa mga butang nga Diyosnon ug labaw sa tanan mohatod kanato sa pagsimba Kaniya.

Sa laing bahin, isip mga Kristiyanos gipahinumdoman kita nga ang atong relihiyon dili eksklusibo, kita andam sa pagdawat sa uban aron molambo ug molipang ang gingharian sa Diyos. Ang Diyos nagtawag kanatong tanan aron pagpadayag sa iyang dakong gugma kanato ug aron pagpaambit niining maong gugma sa Diyos ngadto sa tanan.

Sa katapusan, ang kinaiya nga gipakita ni Juan diha sa atong Ebanghelyo kini nagpadayag usab sa matag-usa kanato nga diha sa atong katilingban lisod kab-oton ang panaghiusa. Anaa kanunay ang espiritu sa kompitisyon – ang paglabwanay sa kada miyembro. Diha sa katilingban atong makita ang pagkabahin-bahin niini. Apan ang Diyos nagpahinumdom kanato nga kita kanunayng abli sa Espiritu sa panaghiusa ug dili nato pugngan ang matag-usa sa paghimo sa mga dagkong mga butang sa ngalan sa Ginoo. Kanunay kitang magtinguha sa panaghiusa ug atong tabangan ang matag-usa nga mapadayag ug makahimo sa mga butang nga gusto sa Espiritu sa Dios nga ipabuhat kanila. Atong dayegon ang Diyos nga naghimo kanato nga managlahi sa usag-usa. Ato kining gamiton nga instrumento nga ang panaglahi dili babag sa kahiusahan sa katilingban nga nagapanaw paingon sa matuod nga panaghiusa sa gingharian sa Diyos nga gipadayag sa panaghiusa sa Santissima Trinidad – Amahan, Anak ug Espiritu Santo. (Rev. Fr. Soren Abellanosa)