Pan ug Handumanan: Giya sa Ika-87 nga Kapistahan ni San Nicolas de Tolentino

Liryo, bitoon, ug ang iyang pan nga milagroso — kini ang tulo ka mga timailhan sa balaang Santos nga si San Nicolas de Tolentino, ang patron diin ginasaulog ang kapistahan matag Septembre 10 sa tuig. Siya gi-anak niadtong tuig 1245 sa Italya. Ang iyang bililhon ug mapaubsanong kinabuhi sukad sa iyang kabatan-on hangtod sa siya nahimo isip orden sa mga Augustino ang nagsilbi isip tema nga nagkanayon, “Pagkamaampuon ug Pagkamalaumon, Gilarawan diha sa Kinabuhi ni San Nicolas”.

Sa siyam ka adlaw nga pagnobena, nagsilbi isip tema sa matag homiliya ang kinabuhi ni San Nicolas de Tolentino, kung asa walay pakyas nga gipahinumdoman sa matag usa ang pagkinabuhi diha sa himaya sa Ginoo. Ang kasaysayan sa parokya nagsugod upat ka dekada ang milabay sukad niadtong Pebrero 16, 1984 diin gitukod ang San Nicolas de Tolentino Cathedral isip sentro sa kalihokan sa ekonomiya sa siyudad sa Mati kung asa dili lang kini duol sa pantalan ug mga perusahaan, apan usab sa mga tawo ug mga deboto na nagatoo sa balaang patron.

Gipangunahan sa Halangdong Arsobispo sa Davao, Romulo G. Valles, D.D. ang Pontifical Mass nga gikonselebrahan sa Halangdong Obispo sa Dyosis sa Mati, Abel C. Apigo, D.D. Miduyog usab sa selebrasyon ang mga Diosesano ug Relihiyosong kaparian, kamadrehan, mga seminarista, mga anaa sa panggamhanan sa probinsya ug siyudad, mga opisyales ug miyembro sa mga apostolado ug ministriya, mga bisita gikan sa nagkalain-laing mga parokya, ug mga laykong parokyano ni San Nicolas de Tolentino.

Gisugdan sa Arsobispo ang iyang homiliya sa iyang kasinatian sa dihang miadto siya sa Tolentino nga anaa sa amihanang-sidlakang bahin sa Italya duol sa dagat kung asa gilubong si San Nicolas. Sunod nga gihatagan niya ug pagtagad ang panultihon sa Ginoo “buhata kini aron paghandom kanako”, kini tungod sa pagkinabuhi ni San Nicolas de Tolentino kaniadto diin gi-ablihan niya ang iyang kasingkasing sa kadtong mga nanginahanglan ug sa mga kabos, tungod kay alang kaniya, nakita niya ang Ginoo kanila.

Sa pakighisgot sa wala pa magsugod ang misa, ang Halangdong Obispo sa Dyosis sa Mati, Abel C. Apigo D.D. miingon nga nalahi karon nga tuig sa kapistahan tungod kay natunong kini sa Tuig sa Pag-ampo ug pagpangandam sa Hubileo sa Paglaum. Nagpahayag usab ang Obispo sa iyang hagit sa tanan, nga sama kay San Nicolas, ipadayon ang pagkama-ampoon ug pagkamalaumon kay mao kini ang atong kusog isip mga Kristiyano — ang magmalig-on diha sa atong pagpakabuhi sa atong pag-ampo.

Angay lamang nga himoong ehemplo sa kadaghanan ug mas labaw na sa kabatan-onan si San Nicolas de Tolentino, kung diin ang iyang maayong buhat ug serbisyo nagpakita sa labing importante nga aspeto sa Kristohanong pagtoo. Siya usab nailhan isip patron sa mga kalag sa purgatoryo, tungod kay kadtong buhi pa siya, nagapahinungod siya og mga pag-ampo sa ilang mga kalag aron ilang maabot ang kahimayaan sa langit. Sa pagkanonisar sa iya niadtong 1446 ni Pope Eugene IV, tungod sa iyang putli nga kasingkasing, debosyon, ug mga milagro, si San Nicolas de Tolentino nahimong usa sa labing gihigugma nga mga santos sa Katolikong simbahan.

Silbi isip pagpasalamat ug paghinumdom sa iyang pag-alagad, ang pagsaulog sa iyang kapistahan dili lamang magtumong sa kalingawan, apan usab sa pagdayeg sa iyang grasya alang sa parokya. Sa atong komunidad karon, sama sa pag-alagad ni San Nicolas de Tolentino sa iyang isigkatawo kaniadto, kita usab gihagit sa pag-alagad sa walay puas nga pagmahal ug pagserbisyo sa atong mga kaigsoonan. (Ria Angela D. Deocos | SNDTC SocCom News Writer)