“Pagpili sa Krus Labaw sa Kahupayan: Usa ka Tawag sa Sakripisyo Alang kang Kristo”

Ika-24 nga Domingo sa Ordinaryong Panahon (September 15, 2024)
Is. 50:5-9a / Ps. 116:1-2, 3-4, 5-6, 8-9(9) / Ja 2:14-18 / Mk 8:27-35

Dihay usa ka lalaki gipapili nga magpabilin sa iyang pamilya o manarbaho sa layong dapit aron iyang matuman ang iyang dugay na nga ambisyon nga mahimong adunahan. Sa walay pagduha-duha kining tawhana mipili nga mahimong adunahan kaysa makig-uban sa iyang pamilya.

Andam ka ba nga isakripisyo ang imong personal nga ambisyon aron ang pagtulon-an ni Jesus magpadayon sa pagkaylap? Sama pananglit imong ihatag ang imong kalibutanong kinabuhi aron sa pagbuhat og usa ka butang alang sa mas dakong himaya sa Dios?

Tingali dili nimo ihatag ang imong kalibutanong kinabuhi alang sa usa ka kinabuhi nga magsakripisyo uban ni Jesus. Kinsa man ang mubuhi sa kinabuhing kasayon ug kahupayan niining kalibutana aron makig-uban sa usa ka kinabuhi uban ni Jesus? Tingali pipila lamang tungod sa kamatuoran nga ang pagsunod kang Jesus dili sayon.

Apan wala kita dad-a sa Dios dinhi sa kalibotan aron mahimong lungsoranon niining kalibotana. Ang Dios midala kanato niining kalibutana aron kita makahimo sa usa ka butang nga makaambit uban sa misyon sa Iyang anak nga si Jesus. Mao kini ang tinguha sa Dios alang sa matag usa kanato: Ang pagtabang kang Jesus sa pagpakaylap sa Iyang misyon.

Moabot ang panahon nga matigulang na kita ug siguradong mamalandong kita kung gi-unsa nato pagpuyo ang atong kinabuhi. Ug atol sa maong pamalandong atong madiskobrehan nga nagkinabuhi kita nga takus, makahuluganon ug natuman nga kinabuhi tungod kay gipili nato ang paghalad sa atong kinabuhi alang sa misyon ni Jesus.

Busa, kinahanglang andam kita nga mupas-an sa atong kaugalingong krus alang kang Kristo bisan unsa pa kini kabug-at. Kinahanglang andam kita nga mawala ang atong kinabuhi niining kalibotana aron atong makaplagan ang tinuod nga katuyoan ug kahulogan niini uban kang Jesus. (Br. Ignatius Gonzales, CFA)