Marian Youth Festival of Sta. Ana Shrine Parish

Ang mga batan-on sa Sta. Ana Shrine Parish nagpahigayon ug usa ka kalihokan nga gitawag nila ug Marian Youth Festival atol sa pagsaulog sa ika – 3 katuig nga kapistahan sa ilang pagdebosyon kang Maria Bambinella. Ang maong kalihokan gipahigayon niadtong Septembre 7, 2024 sa Sta. Ana Shrine Parish, Sta. Ana Avenue. Gipangulohan kini sa ilang kura paroko nga si Rev. Fr. Jose Junar Dela Victoria, uban si Rev. Fr. Amiel E. Arado.

Kining maong kalihokan gibuhat aron ang mga batan-on mahimong inspirasyon si Birhen Maria na mutubo diha sa ilang pagtoo ug mahiduol kang Jesus nga iyang pinalanggang anak.

Ang maong kalihokan gisugdan sa Santos nga Misa nga gipanguluhan ni Rev. Fr. Junar Dela Victoria. Sa iyang homiliya, miingon siya nga ang kasaulogan sa pagkahimugso sa Mahal nga Birhen Maria, kini usa ka selebrasyon nga gitawag ug doble nga grasya (double grace). Ang pagkahimugso sa Mahal nga Birhen Maria nag-andam sa iyang papel isip inahan sa Dios. Mao kana ang doble nga grasya. Kay uban ni Maria naa nato si Jesus.

Human sa Santos nga Misa misunod dayon ang usa ka programa nga gipangunahan sa Sta. Ana Youth Apostolate. Kini nga programa gipadayag sa nagkadaiya nga mga presentasyon. Sa mga bata, sa mga tigulang, ug sa mga kabatan-onan diin ila kining ipasundayag pinaagi sa mga kanta, sayaw, ug drama nga nagpunting sa Mahal nga Birhen Maria. Sa maong presentasyon gihulagway ang pagdebosyon sa Mahal nga Birhen Maria pinaagi sa pag-ampo sa santos nga rosaryo. Matud pa ni Rev. Fr. Amiel, “usahay dili nato masabtan ang ato pagdebosyon sa Mahal na Birhen Maria, apan pinaagi sa kanunay nato na pag-ampo sa santos nga rosaryo atong masabtan na and Dios kanunay naga-uban kanato. Ug kini mao ang atong premyo diha sa atong paghigugma sa atong Inahan.

Sa wala pa matapos ang maong programa mipadayag ug gamay nga mga pulong si Rev. Fr. Junar agig pagpanapos sa maong kalihokan. Siya miingon nga ang maong kalihokan gihimo aron ang tanan malambigit diha sa ilang pagdebosyon kang Maria. Ang maong pagdebosyon nagpadayag usab ug usa ka pagtudlo (“devotions are also instructional”) matud pa niya. Ug pinaagi niining maong selebrasyon masabtan unta sa tanan na ang pagdebosyon sa Mahal na Birhen Maria nagpadayag kung unsa ka duol kanato ang presenya ni Jesus.