Mapaubsanong Pagpangalagad: Hagit Sa Kapistahan Ni Sr. San Roque

Malipayon nga gisaulog sa mga GKK Servant Leaders (GSLs) ug Miyembro sa Gagmay’ng Kristohanong Katilingban (GKK) Sr. San Roque, Emilia Homes, Cabantian diin nahisakop sa Parokya sa St. Mary of the Perpetual Rosary Parish ang ika biente dos (22) ka tuig nga kapistahan sa mahal nga patron inubanan sa tema nga nagkanayon: “SR.SAN ROQUE: Modelo sa Diosnong Pagpangalagad, diha sa Pagkamapaubsanon, Malipayon ug Madasigon nga Piniyalan”. Nagsugod ang Nobena/Kasaulogan sa Pulong niadtong Agosto 8 hangtud Agosto 16, 2024 sa alas siete ang takna sa gabii. Panahon sa bisperas, Agosto 16, 2024, Biyernes adunay prosesyon nga gipahigayon sa alas singko sa hapon palibot sa tibuok subdivision sa Emilia Homes.

Ang Santos nga Misa gisaulog sa Agosto 17, 2024, Sabado sa alas nuebe sa buntag nga gipangulohan ni Reberendo Padre Dionisio C. Tabiliran, Kura Paruko sa St. Mary of the Perpetual Rosary Parish. Sa homilya sa Kura Paruko, gihatagan og gibug-aton ang hiyas ni San Roque nga mapa-ubsanon sa pagtambal sa mga masakiton bisan pa nga ang sakit makatakud. Ang ikaduhang hiyas ni San Roque ang pagka matinud-anon ug madasigon sa Dios, taliwala sa mga hagit nga nasinati sa Katilingban. Ang ikatulo ang pagsalig sa Ginoo diin mao kini ang hagit sa mga magtutoo: “Andam ba kita motahan sa atong kaugalingon sa pag-alagad alang sa kalamboan ug kahiusahan sa Katilingban?”

Pagkahuman sa Santos nga Misa adunay panag-ambitay sa mga halad nga gidala sa mga miyembro alang sa salo-salo. Adunay programa nga gipahigayon sama sa parlor games ug uban pa. Sa katapusan mapasalamaton si Reberendo Padre Diony sa kalampusan sa selebrasyon ug nanghinaut nga unta mahisama sa Mahal nga Patron, Sr. San Roque magpabiling mahigugmaon sa isig-katawo.

Viva! Sr. San Roque!

(By Aurelia A. Ayco, GKK SoCCom | Photos by Bella Sangadi)