Archbishop Thibault Media Awards (ATMA) Gilusad

Agi’g pagsaulog sa ika-setentay singko nga anibersaryo sa Arkidiyosis sa Dabaw, niadtong Agosto 27, 2024, gilusad ang Archbishop Thibault Media Awards (ATMA) nga pinanguluhan ni Archbishop Romulo G. Valles, D.D. Arsobispo sa Dabaw ug Chairman sa Board of Trustees sa Davao Verbum Dei Media Foundation Inc. Nahitabo ang maong paglusad sa The Bridge, Davao Light & Power Company, C. Bangoy St., Davao City.

Unsa man kining ATMA? Kini mao ang gibuhi nga Davao Catholic Mass Media Awards o DCMMA. Tungod kay ang simbahan sa Dabaw nagsaulog man og Diamond Jubilee niini, kini gipahinungod sa unang obispo sa Dabaw nga si kanhi Arsobispo Clovis Thibault, nga usa ka PME. Gimugna niya ang media ministry sa simbahan sa Dabaw pinaagi sa Davao Sentinel nga nahimong Ang Taboan, ug karon, ang Davao Catholic Herald.

Ang ATMA nagtumong sa pagpasidungog sa dungog sa media. Kini dinasig sa katakos sa pag-alagad, pagpasiugda sa kamatuoran, pagpalambo sa kalinaw, ug gugma alang sa kabuhatan. Ang ATMA gilangkoban sa mga educational intitutions, media practitioners ug mga pribado ug publiko nga mga institusyon dinhi sa Arkidiyosis sa Dabaw. Ang ATMA wala lamang nag-ila sa talagsaong kalampusan sa mga propesyonal sa media apan nagsilbi usab kini nga pahinumdom sa panawagan sa Simbahan nga makig-uban sa kalibutan pinaagi sa kamatuoran ug gugma.

Ang matag kategorya niini gidesinyo aron ipakita ang misyon sa Simbahan sa modernong kalibutan nga nagtubag sa mga kontemporaryong mga isyu, labi na diha sa atong palibot, ang pagkapiniyalan, ang dignidad sa tawo, ang pagpromotar ug pagpalig-on sa pamilya, ug pag-uswag sa tawhanong katungod. Pinaagi niini ang Simbahan sa Dabaw nagtinguha sa pagdasig sa mga media practitioners nga mahimong usa ka tinuod nga influencer nga maghatag gahum sa Simbahan ug sa katilingban sa kinatibuk-an.

Ang paglusad niini nga gipahigayon niadtong martes mao ang opisyal nga pagbukas ug paghatag pahibalo sa lokal nga media ug media professionals nga gustong musalmot. Pagatagaan ug hataas nga panahon ang pagsumite sa mga entri sa napulo’g tulo ka mga kategorya, ug ang mga desisyon sa mga maghuhukom kon kinsa ang mga mananaog niini ideklarar sa sunod tuig.

Ang ATMA makonsiderar nga usa ka kalihukan aron sa pagpasidungog dili lamang sa mga professional media practitioners kondili usab aron mapakita ang responsableng paggamit niini. Sama sa giingon sa Pontifical Council alang sa Social Communications nga ang interes sa Simbahan sa Internet usa ka partikular nga pagpahayag sa iyang dugay na nga interes sa media sa social communications. Ang pagtan-aw sa media isip resulta sa makasaysayanong proseso sa siyensiya diin ang katawhan “nag-uswag ug dugang sa pagdiskobre sa mga kahinguhaan ug mga mithi nga anaa sa tibuok kabuhatan”, ang Simbahan kanunay nga nagpahayag sa iyang kombiksyon nga kini, subay sa mga pulong sa Ikaduhang Konsilyo Vatikano, “kahibulongang teknikal nga mga imbensiyon” nga dako na kaayog nahimo aron matubag ang mga panginahanglan sa tawo ug mahimo ang mas daghan pa. (The Church and Internet, 1)

(By Sem. Resty Cabahug)