Ang Kaminyoon usa ka Sakramento

Ika-27 nga Domingo sa Ordinaryong Panahon (October 6, 2024)
Gn 2:18-24 / Ps 128:1-2, 3, 4-5, 6 / Heb 2:1-11 / Mk 10:2-16

Unsa man ang Kaminyoon? Nganong kinahanglan man kining panalipdan? Niining ika-kawhaan ug pito nga Domingo sa ordinaryong panahon, gidapit kita sa pagpamalandong sa kamahinungdanon ug importansya sa sakramento sa kaminyoon ug sa kinabuhi sulod sa pamilya.

Kita gipahinumduman nga ang kaminyoon gitukod sa Dios. Busa, kini kinahanglang ampingan ug panalipdan. Apan sa atong katilingban karon, kini nga mga mahinungdanong institusyon nag-atubang sa dakong hulga. Ang sakramento sa kaminyoon ug tibook banay sa pamilya nag-atubang ug dakong hagit. Kung atong mahinumduman sa miaging mga bulan adunay gipasaka nga balaodnon bahin sa diborsyo nga dili lamang muguba sa bugkos sa managtiayon apan lakip na sa tibook pamilya ug sa sakramento nga ilang gipanumpaan.

Diha sa atong mga pagbasa, kita gipahinumduman nga ang Dios wala mitugot ni bisan kinsa sa pagguba sa sakramento sa kaminyoon. Apan subo pamalandungon, nga ang mga sukwahi nga mga panghunahuna maoy naghari sa ubang magbabalaod. Diin ang diborsyo gikonsiderar nga solusyon sa kagubot tali sa managtiayon.

Apan angay natong sayron nga kung makasinati man ug kalisod sa kinabuhi isip minyo, ang diborsiyo dili garantiya sa kalinaw. Kini dili solusyon sa mga problema sulod sa kaminyoon. Mao kini ang dayag nga giingon ni Jesus diha sa ebanghelyo.

Kung atong tan-awon, ang nagpaluyo sa diborsyo mao ang kawalay katakus sa pagkab-ot sa usa ka matood nga gugma, sa pagsinabtanay ug sa pagpangitag paagi nga ang kaminyoon mapuy-an sa hingpit sa managtiayon. Ug lain nga paagi, ang diborsyo nagpakita lamang sa kakulang sa paghigugma, pagpasaylo, pagkamasinugtanon ug pagtinahuray sa usag usa.

Kung ang pundasyon sa kaminyoon dili lig-on, nga sa ato pa wala matukod sa tinood nga gugma, pagkamatinud-anon, ug pag-ampo, gamay ra ang kahigayonan nga kini makalahutay panahon sa dakong unos sa kinabuhi. Tungod kay sa kaminyoon, kinahanglan anaa ang pagkahamtong sa tinguha. Kahamtong dili lamang sa pisikal apan sa kinatibuk-an lakip na ang spiritwal ug sikolohikal aron makab-ot ang panaghiusa.

Sa katapusan, ang atong mga pagbasa nagpahinumdom kanato nga atong tinguhaon ang pagpanalipod niining balaan nga sakramento sa kaminyoon ug ang kinabuhi sulod sa pamilya. Maghari unta sa matag-usa ang gugma, pasaylo, ug pagkamasinugtanon aron nga makab-ot ang katumanan sa mga plano sa Ginoo diha sa pamilya pinaagi sa pagpalig-on niining maong sakramento uban sa grasya ug panalangin sa Dios. Amen. (Sem. Resty Cabahug)