Ang Gahum sa Pulong sa Ginoo

Ika-23 nga Domingo sa Ordinaryong Panahon (September 8, 2024)
Is 35:4-7a / Ps 146:7, 8-9, 9-10 (1b) / Jas 2:1-5 / Mk 7:31-37

Ang atong Ebanghelyo karong adlawa naghisgot bahin sa pag-ayo ni Jesus sa usa ka bungol nga naglisod usab sa pagsulti. Kini nga panghitabo usa ka talagsaon nga pagpakita sa gahum ni Kristo ug sa iyang dakong gugma alang sa mga tawo.

Si Jesus giguyod sa mga tawo ug gihangyo nga ayuhon ang usa ka dili makadungog nga tawo. Gibutang ni Jesus ang iyang mga tudlo sa mga dalunggan sa bungol ug gigamit ang iyang laway sa pagdapat sa dila niini. Sa walay paglangan, minghunghong si Jesus ug mihangad sa langit ug miingon, “Effata” nga buot ipasabot, “Abli” Dihang iyang giingon kini, diha-diha nakadungog ang bungol ug nakasulti na usab ug klaro.

Alang kanatong mga magtotoong Katoliko kini nga pagtulon-an naghatag kanato og mga punto nga makatabang sa pagkinabuhi subay sa kabubut-on sa Diyos:

Una, Pag-abli sa atong kasingkasing ug hunahuna: Sama sa bungol nga tawo nga giayo ni Jesus, kinahanglan usab nga mag-abli kita sa atong kasingkasing ug hunahuna ngadto sa mga sugo sa Diyos. Ang atong mga kakulian sa espirituhanong bahin, sama sa kakulang sa pagtuo o pagduda, mahimong malagpot pinaagi sa pagdawat nato sa gahum ug grasya ni Kristo. Kinahanglan kitang mag-ampo ug magpabilin nga andam sa pagtugyan sa atong mga kasingkasing ngadto sa iyang kabubut-on. Ikaduha, Pagsalig sa gahum ni Kristo: Sa atong pagkinabuhi, may mga higayon nga makasinati kita ug mga problema nga dili nato masulbad sa atong kaugalingon, sama sa mga sakit, kalisud, o mga pagsulay sa kinabuhi. Kini ang mga panahon nga kinahanglan nato isalig ang tanan ngadto kang Kristo, sama sa gibuhat sa mga tawo nga nagdala sa bungol ngadto kaniya. Ang pagsalig sa Diyos ug pagsalig sa iyang plano alang kanato mao ang yawi sa tinuod nga kalipay ug kalinaw. Ikatulo, Pagsangyaw sa mga kaayo sa Diyos: Human sa milagro, bisan kung gisugo ni Jesus nga dili ipanabi, ang mga tawo wala makapugong sa pagsulti bahin sa iyang kaayo. Ang ato usab nga tahas isip mga magtotoo mao ang pagsangyaw sa mga kaayo nga atong nasinati tungod sa atong pagtuo kang Kristo. Kini atong pagapuy-an pinaagi sa atong mga buhat ug pulong, aron ang uban nga wala pa makaila sa Diyos makauban nato sa pagsimba ug pagdawat sa iyang grasya.

Sa Katapusan, ang mga pagtulon-an sa ebanghelyo nag-awhag kanato nga magpadayon sa pag-abli sa atong mga kaugalingon sa kabubot-on sa Diyos, magpabilin nga masaligon sa iyang gahum ug kaayo, ug mahimong madasigon sa pagpakaylap sa iyang gugma ngadto sa uban. Sa atong pagkinabuhi nga subay sa iyang kabubut-on, mamhimo kitang magmabungahon ug mamahimong saksi sa mga milagro sa Diyos sa atong kinabuhi. (Fr. Julius Lugay)