Ang Debosyon kang Maria Bambinella

Ang Maria Bambinella o Batang Maria usa ka debosyon ngadto sa Mahal nga Birhen Maria aron sa pagpasidungog kaniya sa iyang pagkabata. Kini usa ka debosyon nga nagagikan pa sa Milan, Italy, diin ang atong Mahal nga Birhen nailhan nga Maria Bambina o Bambinella, ug sa paglabay sa mga katuigan mikaylap kini sa tibuok kalibutan. Sa matag pagsaulog niini nga kapistahan gitawag ang tanan sa pagdayeg sa Balaan nga Santisima Trinidad tungod sa mga kahibulongang butang nga nahimo diha kang Maria, gikan sa panahon sa iyang pagpanamkon ug sa pagpamalandong sa mga bunga sa pagtubos nga gihimo ni Kristo diha kaniya.

Sumala pa sa mga manunulat, ang debosyon sa Maria Bambinella unang gisaulog sa Sidlakan nga Simbahan sa Jerusalem. Sa usa ka Byzantine nga simbahan ang gitukod didto sa panahon sa ikalimang siglo, sa lugar diin usa ka tradisyon nag-ingon nga ang balay ni Sta. Ana ug San Joaquin kaniadto nagbarog. Ang orihinal nga simbahan naguba sa panahon sa mga Krusada ug gitukod pag-usab sa ulahi nga nahimo karon nga usa sa mga sentro sa panawduaw. Ang modernong kanon sa kasulatan wala magrekord sa pagkatawo ni Maria. Ang labing una nga nahibal-an mahitungod sa istorya sa pagkatawo ni Maria makita sa Protoevangelium ni Santiago nga Apostol uban sa iyang mga ginikanan nga nailhan nga sila si Sta. Ana ug San Joaquin.

Ang Pilipinas nailhan sa Katolikong kalibotan nga “Pueblo Amante de Maria”, usa ka Kinatsila nga pulong nga nagkahulogang “Bayang Sumisinta kay Maria”, tungod kay ang katawhang Pilipino adunay lig-on kaayong debosyon ngadto sa Mahal nga Birhen Maria. sukad sa panahon sa Espanyol ug kini napamatud-an sulod sa mga siglo. Ang debosyon sa Bata nga si Maria sa Pilipinas unang gipaila sa mga Spanish Missionaries sa nasud. Dinhi sa Arkidiyosis sa Dabaw kini nga debosyon mitubo ug padayon nga gipalambo sa mga magtotoo diha sa Parokya sa Sta. Ana Shrine. Ang maong debosyon ginasaulog matag Septembre 8 sa matag tuig, sa adlaw sa kapistahan sa adlaw’ng natawhan sa atong Mahal nga Inahan. Ug, karong tuiga, mao na ang ikatulong tuig sa kapistahan sa debosyon ngadto kang Maria Bambinella. Sa pagsaulog sa unang tuig nga kapistahan niini, si Arsobispo Valles miingon sa iyang homiliya nga si kanhi Bp. Lunas ang mitudlo kaniya sa talagsaong imahen ni Maria Bambinella – ang imahe sa batang Birhen Maria. Ug, uban sa tabang sa usa ka Rogationist nga pari, nasugdan ang usa ka espesyal nga debosyon kang Maria Bambinella.

Ang debosyon sa Pagkabata ni Maria o Maria Bambinella nagsugod sa mga selebrasyon sa tulo ka kapistahan nga gipahinungod kaniya – sa iyang pagkabata, sa pagngalan kaniya, ug sa iyang presentasyon sa templo. Ingon nga si Jesus gisimba sa Iyang Diosnong Pagkabata, si Maria usab gi-venerar sa iyang pagkabata. (Sem. Resty Cabahug)