Abling Pultahan sa Diosnong Kalooy ug Pagbag-o

Niadtong Septembre 14, 2024 atol sa kapistahan sa Kadaugan sa Krus, mao usab ang pag-abli sa Balaang Pultahan kon Holy Door didto sa San Pedro Cathedral niining siyudad sa Dabaw. Sa sulat sirkyular ni Most Rev. Romulo G. Valles, D.D. giingon nga gitugutan sa Santo Papa ang pag-abli sa Balaang Pultahan alang sa indolehensya nga ihatag sa mga matuohon ug sa mga peregrino nga buot mubisita sa maong pultahan sa Arkidyosis sa Dabaw atol sa pagsaulog sa Diamond Jubilee Anniversary.

Unsa man kining Plenary Indulgence? Kini mao ang hingpit nga kapasayloan sa tanang temporal nga silot tungod sa mga sala kansang pagkasad-an napasaylo na. Dugang niini, aron nga tiunay nga madawat ang indolehensya gikinahanglan nga ang usa ka matuohon makahimo sa tulo ka mga buluhaton nga mao ang sakramental nga pagpangumpisal, pagdawat sa Balaang Komunyon ug ang paggahin ug mga mga pag-ampo alang sa katuyuan sa Santo Papa.

Ang pag-abli sa Balaang Pultahan sa Arkidiyosis sa Dabaw usa ka mahinungdanong panghitabo nga nagsimbolo sa pasalig sa Simbahan sa kaluoy ug pagpakig-uli. Kini nga buhat nakagamot pag-ayo sa tradisyon sa Simbahan nga nagsilbi nga usa ka gamhanan nga pahinumdom sa agianan gikan sa sala ngadto sa grasya, nga nagdapit sa mga matuuhon nga makasinati sa walay katapusan nga kalooy sa Dios.

Si Papa Francisco miingon nga ang pag-agi sa Balaang Pultahan usa ka oportunidad sa pagkakaplag pag-usab sa kaluoy sa Amahan, kinsa nag-abiabi sa tanan ug nangita og personal nga pakigtagbo sa matag usa. Kini nga buhat dili lamang seremonyal; kini usab nagrepresentar sa usa ka espirituhanong panaw diin ang mga magtotoo gitawag sa pagbiya sa sala ngadto sa pagdawat sa grasya nga gitanyag sa Dios.

Kini nagpasabot usab sa pagkaabli sa Simbahan ngadto sa tanan kinsa mihulagway sa Iyang kaugalingon ingon nga pultahan diin ang mga magtotoo makakaplag sa kaluwasan (Juan 10:9). Dugang pa, ang pag-abli sa Balaang Pultahan nahisubay sa mas lapad nga misyon sa Simbahan sa pagtabang sa mga nanginahanglan, ug nagpalanog sa mga sentimento nga gipahayag ni Papa Francisco mahitungod sa kamahinungdanon sa pagpabilin sa mga pultahan sa mga simbahan nga abli alang sa tanan.

Aron paghatag og gibug-aton sa lawom nga kahulogan sa atong panaw isip Simbahan, ang Holy See miaprubar sa pag-abli sa Balaang Pultahan sa San Pedro Cathedral niadtong Septembre 14 ug magpabilin kining abli hangtud Disyembre 17, 2024 human sa ikaduhang adlaw sa Misa de Gallo. (Sem. Resty Cabahug)