70 Anyos nga Pan sa Tagurot: Alang sa kapistahan ni San Nicolas de Tolentino

Nahimutang diha sa suok nga dapit sulod sa Arkdyosis sa Davao mao ang usa sa pinaka dugay na o nag-unang Gagmay’ng Kristohanong Katilingban kon GKK nga mao ang GKK San Nicolas De Tolentino sa Brgy. San Nicolas, Panabo City – kanhing Brgy. Tagurot. Sulod sa 70 ka tuig sa maong pagkahimugso, ang maong GKK nagpadayon og barog ug nagapasalamat sa giya nga kanunay nagadagayday gikan kang San Nicolas kinsa mao ang patron sa maong katilingban.

Gani, kaniadtong Septembre 10, 2024 gisaulog sa maong katilingban ang kapistahan sa maong santos uban sa ilang kura, Rev. Fr. Rolando Mandreza kinsa mao usab ang nangulo sa gipahitabo nga Santos nga Misa isip pagpasalamat sa mga grasya nga ilang nadawat tinabangan sa pangaliya ni San Nicolas. Tataw gayud ang pagtuhop sa mga hiyas sa maong santos sa katawhan sa GKK San Nicolas sa dihang isip pagtimbaya, mibuhat ug inisyatibo ang maong GKK sa pag-imbita sa DXGN 89.9 Spirit FM aron mapaambit usab nila ang ilang gipahitabo nga selebrasyon ngadto sa uban. Usa ka inisyatibo nga naggikan sa katawhan. Inisyatibo nga naghulagway sa usa ka-sinodal nga simbahan. Busa milanog gayud ang mensahe ni Fr. Mandreza sa iyang homiliya sa dihang gipahinumdoman niya ang katawhan sa kinabuhi ni San Nicolas kinsa naningkamot nga ma-puyan usab ang kinabuhi sa atong Ginoo pinaagi sa iyang pagkaepektibo nga magsasangyaw dili lamang sa pulong kondili labaw na gayud sa buhat nga gilarawan sagad sa iyang mga imahe kung diin ang mao nga santos nag gunit ug pan alang sa uban.

Manghod lamang ug 5 ka-tuig sa pagtukod usab sa arkidyosis sa Davao kaniadtong 1949, ang maong GKK nagpabilin usab nga hulagway sa kaluoy ug pagserbisyo sa Brgy. San Nicolas diha sa ilang pagtambayayong isip usa ka-katawhan. Nga sama sa pan nga mi-ayo ug gina-tunol ni San Nicolas kaniadto, ang maong katilingban usab naningkamot nga mahimong mga pan sa kaluoy ngadto sa uban sa sulod sa 70 ka-katuigan. Pan nga simbolo sa kamaayo ug pag-amping sa atong Ginoo. Pan nga naghulagway sa tawag, dili lamang alang sa mga taga San Nicolas, kundili alang kanantong tanan. (Sem. Harvy Enargan)