Usa ka Bahandi sa Pagtoo: San Ignacio de Loyola Nagsaulog sa ika-25 nga Hubileyo

Isip usa ka nagapanaw, nagalaum, ug maampuon nga simbahan, malipayong gisaulog sa parokya ni San Ignacio de Loyola sa San Ignacio, Manay ang ika-25 niini nga kapistahan pinaagi sa Santos nga Misa nga gipangulohan sa Halangdong Obispo sa Diosesis sa Mati, Most Rev. Abel C. Apigo D.D.

Miduyog sa maong selebrasyon ang mga diosesano ug relihiyosong kaparian, mga kamadrehan, mga seminarista, mga anaa sa panggamhanan, mga opisyales ug miyembro sa mga apostolado ug ministriya, mga bisita gikan sa nagkalain-laing mga parokya, ug mga laykong parokyano ni San Ignacio de Loyola.

Sa iyang homiliya, gihandom ni Bishop Apigo ang mga kaparian nga nahimong kabahin sa katukoran ug paglambo sa maong katilingban ilabina ang unang misyonerong pari nga nagdumala niini samtang kini usa pa ka quasi-parish nga si Reb. Padre Jim McAuley.

Gisaysay usab niya nga nagpibilin nga lig-on, nagbarog, ug mapadayunon nga nagapanaw ang maong simbahan. Matod pa niya, “As we look back 25 years ago, it was proven and tested that God journeys with His people. St. Ignatius of Loyola walked with us.” (Sa atong pagbalik-lantaw baynte singko na ka tuig ang milabay, nagpamatuod gayud nga ang Ginoo nagauban sa Iyang mga katawhan. Si San Ignacio nagapanaw uban kanato.)

Pinaagi sa inisyatibo sa Kura Paroko nga si Reb. Padre Pedrito Paciano Mapayo, makita ang pisikal nga kabag-ohan sa istraktura sa simbahan tungod sa suporta ug gugma sa mga parokyano isip mga katawhan niining parokya, gisangonan sa Dios sa buhat sa pagpadayon sa pagpaambit niining pagtoo ug pagpadayon sa nasugdan sa mga misyonero.

Sa katapusan, gihagit ni Bishop Apigo ang mga parokyano nga isip usa ka sinodo nga simbahan, ipadayon ang pagkamaampoon ug malaumon. Matud pa niya, “Si San Ignacio de Loyola puno sa paglaum nga midala sa pulong sa Dios ngadto sa katawhan uban sa iyahang mga kauban nga mga misyonaryo. Ug mao kana nga diha sa atong pagpadayon, dalhon ta kining maong diwa ni San Ignacio — ang tanan alang sa kahimayaan sa Dios. All for the greater glory of God!” (Nicole Palmera – SIDLP SocCom | Photos: The Roman Catholic Diocese of Mati FB Page)