Unsa ang imong katuyuan?

Ika-22 nga Domingo sa Ordinaryong Panahon (September 1, 2024)
Dt 4:1-2, 6-8 / Ps 15:2-3, 3-4, 4-5 / Jas 1:17-18, 21b-22, 27 / Mk 7:1-8, 14-15, 21-23

Sa atong inadlaw-adlaw nga pagkinabuhi dili ikalimod ang kamatuoran nga anaa kitay mga tradisyon ug mga balaod nga atong gipadayon sa pagsunod. Gani sa panahon sa miaging pandemya daghan ang mga balaodnon nga giduso aron masiguro ang kaluwasan sa kadaghanan. Ug mao kini ang katuyoan nganong anaa ang mga balaod aron nga ang tanan magiyahan alang sa kaluwasan. Apan ang balaod sa kalibutan usahay sukwahi sa balaod nga gilatid sa Dios alang sa atong kaayohan.

Sama diha sa Ebanghelyo diin ang mga Pariseo nangutana kang Jesus kon nganong ang iyang mga tinun-an wala magtuman sa mga sugo nga gibilin sa ilang mga katigulangan ug nangaon nga hugaw ang mga kamot. Apan gitawag sila ni Jesus ug mga tigpakaaron-ingnon ug miingon, “kining mga tawhana nagpasidungog kanako sa pulong lamang apan ang ilang kasingkasing halayo kanako. Kawang lamang ang ilang pagsimba kanako kay ang mga sugo nga hinimo lamang sa tawo ilang gitudlo nga balaod kuno sa Dios.”

Kon atong lantawon kini nga mga pulong ni Jesus, kini magdala kanato sa pagsabot nga ang makahugaw sa tawo wala diha sa pagtuman o dili pagtuman sa mga balaod nga anaa sa gawas kondili ang pagbuhat sa mga butang nga nagagikan sa sulod sa atong kasingkasing. Bisan pa ug unsa ka maayo ang atong mga binuhatan apan kon ang katuyuan sa pagbuhat niini dili subay sa kabubut-on sa Dios nan kawang lang ang tanan. Tinood, maayo kita sa panan-aw sa mga tawo apan sa mga mata sa Ginoo mao ba usab gihapon?

Mao nga sa atong kinabuhi kinahanglan kita magbaton ug usa ka tiunay nga diwa sa pagpuyong balaanon ug nga mamahimo kitang sinsero sa atong mga buluhaton. Kinahanglan natong makita ang kalainan sa mga pulong ‘selfless’ ug ‘selfish’, aron kita magiyahan kon ang ato bang mga binuhatan ug pinulungan alang ba sa kaayohan sa kadaghanan o kini alang lang sa atong kaugalingong kalingkawasan?

Busa, sa atong pagpadayon, atong klarohon kung unsa man gayud ang anaa sa atong kasingkasing ug pangutan-on ang atong kaugalingon, unsa man atong katuyuan sa pagbuhat o pagtuman sa mga balaod nga gihatag kanato. Ang ato bang gipanghimo subay sa mga sugo sa Ginoo o mga sumusunod kita sa mga Pariseo? (Sem. Resty Cabahug)