Tigpataliwala: Kasaysayan ug Kasinatian sa Inahanong Pag-amoma

Alang sa Simbahang lokal sa Dyosis sa Digos, ang Agosto 22 dili lamang kasaulogan sa Pagka-Rayna sa Mahal nga Birhen Maria apan usab mao ang espesyal ug dakong kasaulogan sa kapistahan sa iyang titulo isip Tigpataliwala sa Tanang Grasya (Mediatrix of All Grace), ang patron sa inahang simbahan o katedral niini. Dili malimud nga ang mahal nga inahan ni Jesus aduna gayuy pinalabing luna diha sa kinabuhi ug pagtoong Kristohanon. Dili kini layo sa kasinatian sa mga magtotoo sa Dyosis sa Digos tungod kay sa nagkalain-laing paagi nasinati ug nabati ang Inahanong presensya ug pangama sa Mahal nga Birhen Maria, ang Tigpataliwala sa Tanang Grasya.

Ang kasaysayan sa katedral nagpunting sa kamatuoran nga ang Mahal nga Birheng Maria: Tigpataliwala sa Tanang Grasya, mao ang mipili sa mga magtotoo sa Digos. Diha sa pagsubay ni Most. Rev. Guillermo Afable D.D. adunay lawum nga koneksyon kining kasamtangang patron ngadto sa Birhen sa Lipa, nga mipakita niadtong 1948. Tulo ka tuig human niadtong aparisyon, natukod isip parokya ang simbahan sa Digos, ug dakong katingala sa kadaghanan sa katawhan ang pag-usab sa patron, gikan kang San Isidro Labrador ngadto kang Birheng Maria, Tigpataliwala sa Tanang mga Grasya, nga kaniadto dili pamilyar sa katawhan sa Digos. Gituohan nga ang maong pagkausab sa patron kabahin sa dakong debosyon sa kanhing arsobispo sa Davao nga mao si Most. Rev. Clovis Thibault, D.D., ngadto sa Birhen sa Lipa. Siya usab, matud pa ni Cardinal Ricardo Vidal, adunay suod nga pakighigala kang Bishop Alfredo Obviar, D.D., kinsa mao ang auxiliary bishop sa Lipa niadtong panahona. Sa laktud nga pagkasulti, nahimong dako ug dayag ang paghiguma kang Birheng Maria tungod sa iyang dako ug inahanong pagpili ug pagtagad alang sa kristohanong magtotoo sa Digos.

Adunay mga personal nga kasinatian diin nahimong dayag ang tigpataliwala sa atong Mahal nga Inahan. Usa ka higayon akong nabati ang pagpaambit sa usa ka madre nga sakop sa kongregasyon sa Apostolic Daughters of Mary, ang lokal nga congregasyon nga gitukod sa una ug kanhing obispo sa Digos, Most. Rev. Generoso Camiňa, D.D. niadtong Agosto 22, 1989, ug kinsa usab ang nagdesisyon nga sila mapailalum sa pangama sa Mahal nga Birhen Maria, Tigpataliwala sa Tanang mga Grasya. Ang maong madre miasoy sa iyang kasinatian sa panahon sa ilabihang kawad-on tungod sa ilang mga balayrunon. Hapit na sila makabsan sa bugas aron konsumo ug wala siyay igong pampalit niini. Tungod niining kalisud, usa ka gabie nag-ampo siya sa Mahal nga Birhen aron tabangan sila sa ilang kawad-on. Ug pagka-buntag niana, nahibulong silag dako tungod kay adunay naghatud ug usa ka sakong bugas sa may pultahan sa ilang kumbento. Kining maong kasinatian usa lamang sa mga rason nganong dayag ug lalum ang debosyon sa mga magtotoong Digoseňos.

Sa padayong paglabay sa mga katuigan, mas nahimong lalum ang tumang pagmahal sa simbahang lokal sa Dyosis sa Digos ngadto kang Birhen Maria, ang Tigpataliwala sa Tanang Grasya. Usa sa mga timaan niini mao ang pagdaghan sa mga nagkalain-laing grupo ug kalihukan mahitungod ug alang sa Mahal nga Birhen sama sa Confraternity of Mary Mediatrix of All Grace. Sulod usab sa dyosis adunay napulo ka mga parokya ug mission stations kansang patron mao ang Mahal nga Inahan. Niining paagiha nahimong dayag ang pagka-tigpataliwala sa mahal nga inahan sa tibuok simbahang lokal sa Digos. (Sem. Francis Tom Aradillos | Photos: Mary Mediatrix of All Grace Cathedral FB Page)