PAGPAMINAWAY: Paagi sa Pagtinabangay

Niadtong Agosto 6, 2024, nagpahigayon ug usa ka panagtigum ang mga nagkadaiyang Pastoral Agencies sa Arkidiyosis sa Dabaw nga gipanguluhan ni Ms. Victoria Anghag sa Pastoral office alang sa Conversation in the Spirit ug Orientation isip pagpangandam sa extended presbyterium sa Arkidiyosis nga pagahimoon karong umaabot nga Agosto 12, 2024. Sama sa gipahigayon nga pag-inambitay sa mga kaparian atol sa ilang tinuig nga panagtigom ang mga myembro sa mga pastoral agencies sa atong arkidiyosis usab nagkatigom sa maong kalihokan. Pinasubay sa Instrumentum Labores, tumong sa maong kalihukan mao ang paghatag og dugang atensyon sa mga panabut ug mga tensyon nga milanog diha sa kasinatian sa Simbahan pinaagi sa pagpaminaw sa matag usa ug sa pag-ila gikan sa panglantaw sa matag usa ang mga prayoridad nga gihisgotan.

Ang paagi sa pagpaambit sa gihimo sa makatulo ka parte diin ang una mao nga paghatag sa tanan sa oras sa pagpaambit sa ilang mga karisma isip mga lumilihok diha sa ilang tagsa-tagsa ka mga pastoral agency. Ikaduha mao ang paglantaw sa mga kasinatian nga nahisubay sa mga kaasinatian nga gipadayag sa matag usa. Ug, ang ikatulo, mao ang pagpaminaw sa Balaan nga Espiritu Santo ug pagsubay, binasi sa mga kasinatian ug mga pagpaambit, kon unsa ang buot ipaabot kanato sa Ginoo pinaagi dha sa mga karisma ug kasinatian nga naagian sa matag-usa.

Sumala pa, ang Coversation in the Spirit nagpunting sa kalidad sa kapasidad sa usa’g usa sa pagpaminaw ingon man ang kalidad sa mga pulong nga gisulti. Kini nagpasabot sa pagtagad sa espirituhanon nga mga lihok sa kaugalingon ug sa laing tawo sa panahon sa panag-istoryahanay, nga nagkinahanglan sa pagkamatinagdanon nga labaw pa sa mga pulong nga gipahayag. Dinhi niining maong pag-inambitay, ang kalidad sa pagtagad maoy usa ka buhat sa pagtahod, pag-abiabi, ug pagkamaabiabihon ngadto sa uban. Kini usa ka seryoso nga pamaagi aron nga masabtan kung unsa ang nahitabo sa kasingkasing niadtong nagpaambit. (Sem.Resty Cabahug)