Pag-amping sa Pamilya

Agi’g pagsaulog sa umaabot nga ika-75 nga anibersaryo sa lokal nga simbahan sa Dabaw, gipangunahan sa Family and Life Apostolate ubos sa Pastoral office sa Archdiocese ang nagpahigayon sa talagsaong panagtapok sa mga pamilya ug mga Pangulo sa Kristohanong Banay gikan sa nagkadaiyang mga parokya dinhi sa Arkidyosis sa Davao.

Ang maong kasaulogan gipahigayon niadtong Hulyo 27, 2024 sa St. Francis Xavier Regional Major Seminary of Mindanao (ReMaSe) pinanguluhan sa direktor sa Family and Life Apostolate office sa Arkidyosis sa Davao nga si Rev. Fr. Orlando Angelia.

Sa iyang pasiunang pulong sa pagtimbaya, mipadayag si Fr. Angelia sa iyang pagpasalamat sa tanang mga nalambigit sa maong kasaulogan. Iya usab gihataga’g gibug-aton ang pipila ka mga hinungdan niining maong panagtapok sa pamilya ug usa na niana ang paghatag ug pagtagad sa bili sa pamilya ilabi na nga kini buot gub-on sa mga kalibutanong panghuna-huna sa kasamtangang panahon.

Usa usab sa labing mahinungdanong bahin sa maong selebrasyon ang pagpaambit nga gihatag sa magtiayon nga si Mr. Michael and Mrs. Gilda Del Mar mahitungod sa kalipay nga masinati diha sa pagkaginikanan ug diha sa kinabuhi sa pamilya.

Gitapos ang mga kalihokan sa buntag pinaagi sa pagsaulog sa Santos nga Misa nga gipangulohan ni Rev. Msgr. Julius Rudolfa, ang Pastoral Director sa Arkidyosis of Davao, inubanan sa pipila ka mga kaparian sa Arkidiyosis.

Pagkahapon mipaambit si Mr. Edwin Valles, usa ka representante sa Catholic apostolate for persons with same sex attraction and gender identity concerns o mas giila sa grupo nga COURAGE, mahitungod sa pastoral accompaniment sa simbahan ug ilabi na sa matag Kristohanong banay ngadto sa miyembro sa pamilya o sa katilingban sa ka LGBTQIA+++. Gihatagan niyag duso ang ka importansya sa “affective approach” sa paggiya ug pagsabot sa mga LGBTQIA+++ persons.

Uban sa Archdiocesan Commission on Vocation ug sa Davao Archdiocesan Youth Coordinating Apostolate o DAYCA, nahimong malamposon ug makahuluganon ang maong kasaulogan.

Sa katapusan, kining maong kasaulogan nagpadayag sa kamahinungdanon sa pamilya isip pondasyon ug kaugmaon sa katilingban ug sa simbahan. Nagpamatuod kini nga ang simbahan kanunay’ng nangalagad ug nanalipod sa pamilya, ang simbolo sa gugma ug kahiusahan nga gasa gikan sa Dios ang tinubdan sa tanan.

Atong pamilya, ampingan ta. (Sem. Perry Neil G. Patayon)