Kapistahan sa Pagpasaka sa Langit sa Birhen Maria

Ang Labing Bulahan nga Birhen Maria, sa dihang nahuman ang dagan sa iyang yutan-ong kinabuhi, gibayaw lawas ug kalag ngadto sa himaya sa langit, diin nakaambit na siya sa himaya sa Pagkabanhaw sa iyang Anak, nga nagpaabot sa pagkabanhaw sa tanang sakop sa iyang Lawas. (CCC 974)

Niadtong Agosto 15, 2024, atol sa pagsaulog sa Solemnidad sa Pagpasaka sa Langit sa atong Mahal nga Inahan Birhen Maria, gisaulog usab sa Parokya sa Our Lady of Assumption Parish sa may dalang F. Torres St. Davao City ang ilang ika-65 nga tuig nga kapistahan. Sa Santos nga Misa nga gipanguluhan ni Most Rev. Romulo G. Valles, D.D., iyang gipasabot kini nga kasaulogan. Gani ginamit ang pasiunang pag-ampo, iyang gipahinumduman ang mga parokyano nga sa kanunay maghandum sa gingharian sa langit. Nga dili lang magpabilin nga deboto kang Birhen Maria apan maanaa usab unta ang dakong paglaum nga ang pagpasaka kaniya sa langit maanaa usab kanato. Ang maong selebrasyon nahimong nagmalampuson pinaagi sa pagpaningkamot sa mga parokyano lakip ang ilang pisikal nga pagpangandam sa maong dakong kasaulogan.

Kahinumduman nga pipila sa atong mga kaigsoonan ang kanunay nagapangutana mahitungod niini nga kasaulogan sa pagpasaka sa langit sa kang Birhen Maria ug hagit kanatong tanan ang pagsabot bahin niini nga pagtulon-an. Ang dogma nag-ingon nga “si Maria, ang Imakulada nga Inahan sa Dios, kanunay nga Birhen, human sa pagtapos sa iyang kinabuhi dinhi sa yuta, gibayaw lawas ug kalag ngadto sa langitnong himaya.” Kini nga depinisyon ingon man usab sa Immaculate Conception naghimo dili lamang sa paghisgot sa unibersal, tin-aw ug lig-on nga pag-uyon sa Magisterium apan naghimo kini og pasumbingay nga nahiuyon sa pagtoo sa mga matuuhon. Ang Solemnidad sa pagpasaka sa langit kang Birhen Maria nahimong bahin sa espiritwal ug doktrinal nga patrimonya sa Simbahan sulod sa mga katuigan. Kabahin kini sa teyolohikanhong pamalandong ug usab sa liturhiya ug kabahin sa pagbati sa mga matuuhon. (Sem Resty Cabahug)