Ika-6 nga Bibliyampo mabungahon

Ang Arkidyosis sa Davao nagsaulog sa ika-6 nga Bibliyampo (Archdiocesan Biblical Congress). Ang maong kasaulogan gipahigayon niadtong Agosto 3, 2024 sa Jesus and Mary Thevenet School, Bangkal, Davao City. Gipangulohan kini sa direktor sa Archdiocesan Bible Apostolate of Davao (ABAD) nga si Rev. Fr. Ritsche Gamaya, uban ni Bro. Concordio Pondias, Lay ABAD Coordinator ug ni Ms. Zyra Duller; Youth Bible Apostolate (YBA) Coordinator.

Kining maong kongreso gisaulog aron mas mapalambo pa ang pormasyon sa Pulong sa Dios diha sa katawhan ilabina sa atong mga kabatan-onan.

Sa pag-abli sa maong kasaulogan, mihatag og mensahe si Bro. Concordio Pondias sa mga misalmot. Ug misunod na dayon ang pagpasabot ug pagpalawom ni Fr. Ritsche Gamaya sa tema nga mao ang “Word of God: In Journeying Together as a Synodal Church Living Out the Spirituality of Stewardship in our Basic Ecclesial Community”, kini nga tema gihaom sa atong kasaulogan sa setenta y singko nga hubileyo isip Arkidyosis . Gihatagan kini ni Fr. Ritsche Gamaya og gimbug-aton sa panagtapok sa mga apostolado ug ilabina diha sa mga kabatan-onan. Usa usab sa laing bahin sa maong selebrasyon ang pagpaambit nga gihatag ni Bro. Carlwin Tantan mahitungod sa pagpasabot sa Liturgical Bible Study ug misunod na dayon ang pagpakita sa LBS uban nila; Ate Quennie Luz Hamto, Ate Jade Beltran, kuya Gabriel Armecin, kuya Archie Moncada and kuya Carlwin Tantan.

Gitapos ang mga kalihokan sa buntag pinaagi sa pagsaulog sa Santos nga Misa nga gipangulohan ni Rev. Msgr. Julius Rudolfa, ang Pastoral Director sa Arkidyosis of Davao, inubanan ni Fr. Ritsche Gamaya ug Fr. Henry Campeon. Diha sa Santos nga Misa miingon si Rev. Msgr. Julius Rodulfa saiyang homiliya mahitungod niining kasaulogan, “Ang atong tinguha nga mamahimong Bible-based ang atong spiritualidad.”

Sa pagkahapon misunod na dayon ang usa ka segment nga “ChikABAD – Pakighinabi: Ang Maayong Balita”. Sa unang sesyon, mipaabot ang pipila ka mga apostolado sa Pulong sa Dios sa ilang mga kasinatian nga sila si; ate Anna Jessa Abella, ate Cheeryl Arriesgado, kuya Archie Moncada ug kuya Rey Diaz. Misunod dayon ang ika-duha’ng sesyon nga mao ang pakighinabi sa ABAD direktor nga si Rev. Fr. Ritsche Gamaya. Nahimo kini mahinungdanon tungod sa mga maanindot nga mga kasinatian ug labaw pa niana mao ang pagtubag ni Fr. Ritsche Gamaya sa mga pangutana nga gikan sa mga kabatan-onan.

Sa katapusan, kining maong kasaulogan nagpadayag sa kamahinungdanon sa atong pormasyon diha sa Pulong sa Dios ug gani usa sa tulo ka tinubdan sa atong pagtoo mao ang Bibliya og mamahimo nga atong isentro ang atong spiritualidad diha sa Iyang mga Pulong. Ug kung moingon kita og Pulong sa Dios, kini naglangkob sa Daan ug Bag-o nga Testamento kay diha sa Bibliya, mipadayag ang Dios sa iyang mensahe sa katawhan. (Carlwin Tantan | Photos by DCH & ABAD FB Page)