Holy Family Parish Youth Day

Ang Holy Family Parish sa Baliok nagpahigayon og Parish Youth Day niadtong Hulyo 20, 2024 sa tema: “Joyful in Hope.” Adunay 231 ka mga youth nga partisipante sa tibuok parokya gikan sa nagkadaiyang GKK. Nagmalampuson ang usa ka adlaw nga kalihukan nga gipangunahan sa Family and Life Apostolate ug mga PSKB kauban ang Parish Vocation Promoter ug DAYCA. Kini subay sa pagsaulog sa 75th Diamond Jubilee sa arkidyosis uban sa FLA Festival of Families sa bulan sa Hulyo. Ang maong tumong sa kalihukan ang pagdasig kanila sa pag-aktibo sa ilang GKK ug sa Parokya. Ika-duhang tumong mao ang pagpili sa ila GKK PSB ug Zone PSB Coordinators.

Napadayag sa mga batan-on ang ilang mga talento pinaagi sa usa ka role play, gitagaan sila ug pipila ka scenario mahitungod sa relasyon sa anak ug ginikanan, sa mga higala ug sa uyab. Human giputos kini sa pagpasabot sa mga batan-on sa kabililhon sa pamilya nga adunay gugma, pagrespeto ug panaghiusa. Ug usab pagpahinumdum kanila sa maayong relasyon sa mga higala o kauban nga mga batan-on. Nagpahigayon usab ug mga dula, “paugnat sa kusog”, aron magkahimamatay ug masabtan nila ang ka importante sa panaghiusa ug panagtinabangay. Apil nga gihatagan ug pagtagad ang maong Holy Hour sa pagka-alas tres diin gi-ampo ang Divine Mercy Chaplet nga gipanguluhan sa Parish Vocation Promoters ug Divine Mercy Devotees.

Nagpahigayon ang selection sa mga PSB ug PSB Zone Coordinators. Gitapos ang Parish Youth Day sa usa ka misa nga gipanguluhan sa Kura Paroko, Reberendo Padre Roger Duhaylungsod diin iyang gipahinumduman ang mga batan-on sa kabililhon sa paggahin ug panahon sa pagpahulay. Pagpahulay uban ang Ginoo, nga dili lang ihurot ang tibuok semana sa pag-eskwela ug uban pang kalihukan kondili hatagan og panahon ang pagsimba ilabina sa Adlawng Dominggo. Human sa Misa adunay giandam nga mga pahalipay sa ilang awarding ceremony samtang ang uban GSL malipayon nga nagtinabangay sa pag apud-apud sa panihapon. (Dan-Dan Catipay – FLA Coordinator | Photos by Myla Jane Rocaberte)