33rd GKK kapistahan sa St. James the Apostle, Sitio Narra Ecoland

July 25, 2024 – gisaulog sa GKK Santiago Apostol ang ilang ika-33 nga Patronal Fiesta didto Sitio Narra Ecoland, Davao City.

Si San Santiago Apostol, usa sa napulo’g duha ka mga disipulo ni Jesus ug igsoon ni Juan nga Apostol. Apil siya sa suod nga mga higala ni Jesus, nga mitambong sa dagkong mga hitabo sama sa Transpigurasyon o Pagkausab sa Dagway ni Jesus ug Pag-antos sa Tanaman. Gituohan nga nagtudlo si Santiago sa Espanya, ug human siya gilutos pinaagi sa pagputol sa iyang ulo niadtong AD 44, ang iyang patay’ng lawas gituohan nga gibalhin ngadto sa Santiago de Compostela, nga nahimong dakong pilgrimage site. Siya mao ang patron nga santo sa Espanya ug mga peregrino.

Sa sayong buntag sa kapistahan, ang mga ginikanan uban ang ilang mga anak miabot usa ka oras ug tunga sa wala pa magsugod ang misa sa fiesta alas 9:00 sa buntag. Naningkamot sila nga maka pwesto sa atubangan nga mga lingkuranan kay ang Sakramento sa Bunyag sulod man sa Santos nga Misa.

Kanindot tan-awon sa naglibot nga mga panimalay nga nangandam pinaagi sa paglimpyo, pagluto ug pagbutang sa mga dekorasyon.

Ang Pangulo sa Katilingban nga si Divine Lambunao, nagmalipayon dili lamang tungod kay nakaabot na sila sa ilang ika-33 nga piyesta apan tungod usab sa suporta sa mga layko ilabina kay adunay fund raising alang sa pagpalambo sa ilang kapilya.

Ang Santos nga Misa gipangulohan ni Rev. Fr. Zaldy Abonales, gikan sa parokya sa San Pablo. Human sa misa, adunay raffle draw diin ang unang premyo tunga sa sakong bugas. Makapatandog nga hitabo ang pag-abot sa mga tawo nga nagdala ug pagkaon alang sa community lunch. Ang uban usab nadawat ang packed lunches.

Gipahibalo usab nga sa sunod adlaw ang kabatan-onan magtapok alang sa worship night.

Ang ika-33 nga GKK Fiesta ni Santiago Apostol sa Sitio Narra Ecoland natapos nga halandumon, nagpakita sa kusog nga pagbati sa komunidad ug debosyon. Ang malampusong selebrasyon, nga gisugdan sa Santos nga Misa ug natapos sap ag-inambitay sa pagkaon, nagpakita sa kolektibong espiritu ug pagtoo. Samtang magpadayon ang mga kalihokan uban sa youth worship night, ang komunidad nagpabiling nagkahiusa sa ilang pagtoo ug dedikasyon. Si Divine Lambunao mipadayag sa iyang dako nga pagpasalamat sa suporta, nga nagtimaan sa ilang espirituwal nga panaw.