SYC 2024: Salamat, Sunod napud

Malipayon nga mipadayag ang 269 ka mga delegado sa Summer Youth Camp sa San Roque Parish Malabog sa mga pulong pasalamat ngadto sa mga nagpaluyo sa programa.

Kahinumdoman nga nagmalampuson ang maong katikaran niadtong Hulyo 6-7, 2024 uban sa tema nga “Joyful in Hope”, kini nahitabo sulod mismo sa compound sa parokya. Gatosan ka mga batan-on ang misalmot, nalingaw, nakakat-on, nakahimamat og bag-ong higala ug mas naila-ila kung kinsa si Kristo diha sa ilang pagpanaw isip batan-on.

Tumong sa maong programa nga mabalikan ang mga kasinatian sa pakighimamat kang Kristo; mapukaw ang pagtoo ug paglaom sa matag batan-on; malig-on ang ilang pagpakabana sa komunidad, nga sentro si Kristo.

“Welcome kaayo mo diri sa parokya ha”, si Rev. Fr. Cirilo Bermudez, Parish Administrator isip pag abi-abi sa delegado.

Tuod man, mabungahon kaayo ang duha ka adlaw nga panagtigom, gikan sa paghinigalaay, pag lingaw-lingaw, pagdayeg og pagsimba sa Ginoo, pagkat-on sa mga leksyon, pag ila-ila kang Kristo og labaw sa tanan tungod sa hiniusang pag-ampo.

“Salamat Fr. Lolong sa pagtugot ug suporta sa kabatan-onan”, pasalamat ni Judeylyn Crodua, SYC Communication Head. “I am beyond grateful to our Parish Administrator, for the valuable lessons that we learned. SYC really brought us joy because we run in Christ, and He gave us hope”, dungag pa niya.

Sa laing bahin, nabati gayud sa batan-on nga sila pinangga tungod kay anaa man ang presensya sa mga GSL og PSKB, ubos pagpangulo ni Diezabel Bulauan, SRPYA Adviser kinsa nag-atiman sa mga delegado og nakig-uban gikan palang sa pagplano niini.

“Salamat te”, pulong gikan sa mga delegado kinsa giganahan sa mga nahitabo ug mapasalamaton tungod niini.

“Te kanus-a napud?” pangutana nga nagpadayag sa ilang panghinaot nga aduna na usab panagtapok sa mga batan-on sa mga mosunod nga higayon.

Malipayon ang mga delegado nga nanguli bitbit ang ilang mga kasinatian, uban sa paglaom nga kini ilang mapaambit og magamit sa ilang tagsa-tagsa ka mga panaw uban si Kristo.

Sa Kanunay, Dalaygon ang Dios!

(Jozeil Crodua)