Si Kristo Mao ang Pan sa Kinabuhi

Ika-18 nga Domingo sa Ordinaryong Panahon (Aug. 4, 2024)
Ex 16:2-4, 12-15 / Ps 78:3-4, 23-24, 25, 54 / Eph 4:17, 20-24 / Jn 6:24-35

Ang pan sa Ginoo mao kadtong nanaug gikan sa langit ug naghatag og kinabuhi sa kalibutan. Ang atong Ginoong Jesukristo mao ang pan nga gikan sa langit nga nanaug aron paghatag og kinabuhi sa kalibutan. Kini nga kamatuoran atong nadungog mismo sa atong Ginoo nga Siya gayod ang pan nga gikan sa langit. Siya dili ang pan nga gihatag sa Dios sa mga Israelita didto sa kamingawan ug dili usab Siya ang pan nga gipadaghan ug giapud-apod ngadto sa katawhan, Siya dili simbolo; Siya kadtong gisimbolohan sa maong simbolo.

Ang atong Ginoo nag-ingon sa mga tawo nga nangita kaniya “nangita kamo kanako dili tungod kay nakakita kamo og simbolo apan tungod kay nabusog kamo sa pan. Ayaw kamo paghago sa mga butang nga lumalabay lamang apan sa mga butang nga walay katapusan.” Kini nga pagpadayag sa Ginoo mag-awhag kanato nga kita kanunay mangandoy sa pagdawat kaniya diha sa atong kinabuhi tungod kay Siya naghatag sa kinabuhing walay katapusan. Kanunay kitang gipahinumdoman nga ang atong panglangtaw dili lamang sa mga kalibutanong mga butang apan molantaw kita diha sa langitnong reyalidad.

Ug diha sa atong pagsunod kaniya, kita kanunay gipahinumdoman sa pagbuhat sa bulohaton sa Dios. Ang pagbuhat sa bulohaton sa Dios mao nga motoo kita sa iyang gipadala kanato, ang iyang Anak. Kini mao ang sentro sa atong pagkaanaa niining maong kalibutan. Kini maghatag kanato sa kahulogan ug siguradong paglaum sa tanang kalisdanan nga atong masugatan sa panaw sa atong kinabuhi – ang pagtoo diha kang Jesus, ang pagkakaplag kang Kristo.

Sa katapusan kita mahisama sa mga tinun-an nga bisan sa kalisod sa pagtulon-an nga Iyang gipadayag ug daghan ang nagbagolbol ug namiya kaniya, apan sila nagpadayon sa pagtoo kaniya. Matud pa ni Simon Pedro, Ginoo wala kami kapa-ingnan, ikaw ang naghupot sa kinabuhing walay katapusan. Kami mitoo ug kombinsido nga ikaw mao ang Balaan sa Dios. Kung dili kita motoo sa mga pulong sa Ginoo nga nagpakatawo kang kinsa kitang pulong motoo? (Rev. Fr. Soren Abellanosa)