Pinaagi sa Eukaristiya, Kita nahisama Kaniya

Kapin sa upat ka libo ug unom ka gatos nga mga partisipante gikan sa nagkadaiyang parte sa nasud ang mitambong sa duha ka adlaw nga pagsaulog sa ika-44 nga National Anniversary Celebration sa Brotherhood of Christian Businessmen and Professionals (NAC-BCBP), nga gipahigayon sa SMX-Lanang Premier, Davao City niadtong Hulyo 19 ug 20, 2024.

Isip pagkulmina sa maong selebrasyon, gipahigayon ang Santos nga Misa nga gipanguluhan ni Most Rev. Romulo G. Valles, D.D. ang arsobispo sa Dabaw. Sa iyang homiliya gihatagan ug importansiya ni Abp. Valles ang pulong nga ‘Christian’ nga makita sa ngalan sa ilang grupo. Matud pa niya nga isip mga Kristiyano kinsang kinabuhi naka sentro diha sa Eukaristiya, madasig unta ang mga partisipante nga dad-on usab si Kritso ngadto sa reyalidad sa ilang tagsa-tagsa ka mga trabahoan ug mga kaubanan. Dugang pa niya nga dili lamang dad-on ang handumanan ni Kristo kondili ang presensya ni Kristo pinaagi diha sa ilang tagsa-tagsa ka kaugalingon. Kinutlo ang linya sa usa ka awit sa pagsugod, miingon siya nga diha sa atong pagdawat sa lawas ni Kristo panahon sa komunyon, nahimo usab kitang susama kaniya. Mao nga anaa unta ang pagpaningkamot nga mahisama kita kang Kristo. Isip hagit sa mga partisipante, giingon usab ni Abp. Valles nga dad-on ang kinaiya ug kasingkasing sa pagka-karnero, nga mahimong mapaubsanon bisan daghan na kanila ang mga propesyonal ug hanas na sa nagkalain-laing mga natad sa trabaho. Ug, nga magpabilin unta silang magbalantay nga mogiya sa iyang panon.

Ang duha ka adlaw nga panagtapok nahimong mabungahon nga mga adlaw alang sa mga partisipante sa maong aktibidad. (Sem. Resty J. Cabahug)