Misa Pasalamat Sa GKK Divine Mercy

Dili masukod ang kalipay sa mga miyembro sa GKK Divine Mercy Susana Homes, sakop sa Parokya sa Sagrada Pamilya, Baliok, Davao City tungod sa unang higayon nga nakabaton sila og pari nga gikan sa ilang GKK. Si Rev. Fr. Cecilio Lope Canico, usa sa mga giordinahan ni Most Rev. Romulo G. Valles, D.D. niadtong Hunyo 29, 2024 sa San Pedro Cathedral.

Matag unang Dominggo sa bulan, ang GKK Divine Mercy sa Susana Homes nagapahigayon ug Santos nga Misa sa ilang kapilya busa niadtong Hulyo, 7 si Rev. Fr. Cecilio Canico maoy nangulo niini. Usa kini ka Misa pasalamat sa ilang GKK nga gitambungan usab sa mga kaparentihan sa bag-ong pari.

Sa iyang homiliya, siya naghisgot sa kalisod sa kinabuhi sa usa ka propeta ug nagpahinumdom nga kitang tanang mga binunyagan makadawat sa misyon sa pagkapropeta nga magdala sa mensahe sa Dios diha sa katilingban, sa trabahuan ug labaw sa tanan sa kaugalingong panimalay. Dugang pa niya, ang usa ka tao nga dili musulti sa kamatuuran o dili mubadlong sa sayop ug hiwi nga binuhatan dili tinuod nga propeta. Sama nga usa ka pari nga dili musaway sa mga dautang buhat, kana dili tinuod nga pari.

Sa katapusan iyang gipadayag ang dakong salamat sa iyang mga kauban sa GKK sa ilang mga suporta ug pag-ampo. Siya niagi sa mga pagsulay labi na gayod sa panglawas apan tungod sa grasya sa Dios ug pag-ampo sa katilingban iyang naangkon ang Sakramento sa Pagkapari. Siya naghangyo sa tanan, nga kanunay siya iampo nga magmalahutayon sa pagserbisyo sa katawhan ug musunod sa kabubut-on sa Dios. Iya usab nga gipadayag, nga magsaulog siya ug misa sa mga GKK nga nahisakop sa Parokya sa Sagrada Pamilya aron iyang mahimamat ug personal nga mapasalamatan. Iya usab gipasalamatan ang mga kura-paroko nga sila Rev. Fr. Ricky Peñalosa ug Rev. Fr. Roger Duhaylungsod sa paggiya kaniya padulong sa bokasyon sa pagkapari.

Paghuman sa misa, nagtapok ang katawhan alang sa salo-salo pahinungod sa bag-ong pari. Sila nangnadam gayod alang sa espesyal ug bililhon nga okasyon. Nanghinaot usab sila nga aduna pay musunod nga mutubag sa bokasyon sa pagkarelihiyoso gikan sa ilang GKK.

Dako usab ang ilang pasalamat sa mga miyembrong manggihatagon aron masibya sa radyo ug Facebook ang misa pinaagi sa 89.9 DXGN FM aron makasaksi usab ang kanhing kaubanan nga naa na sa layong dapit. (Flor Arellano-Deloria – SoCCom, Holy Family Parish, Baliok | Photos by Widjenie Mascardo)