Dili Magdala ug Bisan Unsa sa Pagpanaw

Ika-15 nga Domingo sa Ordinaryong Panahon (July 14, 2024)
Am 7:12-15 / Ps 85:9-10,11-12,13-14 / Eph 1:3-14 / Mk 6:7-13

Niining ika napulog-lima nga Dominggo sa Ordinaryo nga panahon, gipahinumdoman kita sa atong Ebanghelyo:

Una, Pagsalig ug Pagsunod sa Ginoo: Ang unang punto sa maong ebanghelyo mao ang pagdawat ug pagsalig sa mga sugo ni Jesus bisan pa sa kawalay-klaro. Gisuportahan ni Jesus ang iyang mga disipulo sa ilang misyon bisan pa wala sila magdala ug daghang butang. Kini usa ka pagtulon-an alang kanato nga sa atong kinabuhi, kinahanglan adunay pagsalig ug pagsunod sa Ginoo bisan pa sa atong mga kalisdanan ug kawad-on. Sa atong adlaw-adlaw nga pagkinabuhi, kinahanglan nato nga isalig ang tanan sa Ginoo. Sa bisan unsang kalisdanan nga atong giatubang, mag-ampo kita ug magtoo nga ang Ginoo maghatag kanato sa mga kinahanglanon nato. Kinahanglan usab kita magtuon nga musunod sa iyang kabubut-on ug dili magduha-duha.

Ikaduha, Pagpakabana ug Pagpangayo sa Tabang sa Komunidad: Gipadala ni Jesus ang iyang mga disipulo nga duha-duha aron magpakita nga importante ang pagpakabana ug pagtinabangay. Wala kita mag-inusara sa atong pagpangalagad sa Ginoo, ug kinahanglan nato ang suporta sa matag usa. Ang pagpakig-uban ug pagtinabangay maoy usa ka pamaagi sa pagpalig-on sa atong pagtoo ug pagkugi sa misyon. Sa atong kinabuhi, dili kita kinahanglan mag-inusara sa pag-atubang sa mga hagit. Magpakabana kita ug mangayo ug tabang sa atong pamilya, mga higala, ug komunidad. Mag-ampo kita ug magtinabangay sa pag-abot sa atong mga tinguha ug misyon sa kinabuhi.

Ikatulo, Paghatag ug Importansya sa Simpleng Kinabuhi: Gipakita ni Jesus nga ang simpleng kinabuhi adunay dakong bili. Gisuportahan niya ang iyang mga disipulo nga magdala lamang sa ilang mga panginahanglanon. Kini nagtudlo kanato nga ang materyal nga mga butang dili mao ang makahatag kanato ug kahupayan sa tinuod nga kinabuhi, kundi ang atong relasyon sa Ginoo ug sa uban. Sa atong kinabuhi, magtuon kita nga dili magapahinungod lamang sa materyal nga mga butang. Magbaton kita ug simpleng kinabuhi, ug maghatag ug importansya sa atong relasyon sa Ginoo ug sa uban. Maghatag kita ug oras sa pag-ampo, pagpangalagad, ug paghatag ug gugma sa uban.

Sa katapusan, diha sa Ebanghelyo ni San Marcos 6:7-13, atong makit-an ang daghang pagtulon-an sa pagsalig ug pagsunod sa Ginoo, ang pagpakabana ug pagtinabangay sa komunidad, ug ang paghatag ug importansya sa simpleng kinabuhi. Mag-ampo kita nga ang Ginoo maghatag kanato ug kaisug ug kaalam sa pagkinabuhi sumala sa iyang kabubut-on, ug magmalampuson kita sa atong pagpanaw isip mga magtotoo nga Katoliko. (Fr. Julius Lugay)