176 Ka Tuig, Timaan Sa Buhing Pagtoo

Nagpahayag sa iyahang dakong kalipay ug pasamalat ang arsobispo sa Davao, Most Rev. Romulo G. Valles, D.D., sa iyahang mensahe niadtong pagpahitabo sa PaghiuSayaw 2024: A Journey to the World Through Dance.

Ang maong kalihukan ang nahimong Finale sa kapistahan ni Sr. San Pedro ug usa sa mga nahimong highlights sa pinakabag-ong festival sa Davao, ang Duaw Dabaw.

Usa kini sa pinaka-makasaysayang aktibidad tungod kini ang pinakaunang kolaborasyon sa City Tourism Office ug sa San Pedro Cathedral aron mas mapalig-on ang turismo sa dakbayan. Sa maong kalihukan gipakita ang nagkalain-laing kultura sa tibuok kalibutan gikan sa Japan, Thailand, India, Brazil, Saudi Arabia, ug ang lugar sa Samoa ug dinhi sa Pilipinas, pinaagi sa sayaw sa matag Sona. Ang matag presentasyon sa mga nasud may kalabotan sa mga bili sa pagka-piniyalan: ang pag-amuma sa kaugalingon, sa isigkatawo, sa komunidad, sa nasud, sa kinaiyahan ug sa simbahan. Kining maong mga mithi gipadayag sa mga short videos nga gipasundayag niadtong gabhiona. Ang Opening Salvo ug ang Finale Presentation, gipanguluhan sa Indayog, ang Official Animation Team sa Apostolado sa mga kabatan-unan nga gilangkob sa hapit 70 ka mga mananayaw.

Matud pa ni Archbishop Valles, dako ang iyang pasalamat sa City Government of Davao sa pag-apil sa Fiesta ni San Pedro sa kalihukan sa dakbayan. Kini nagpakita lamang sa dakong kontribusyon sa simbahan sa San Pedro dinhi sa kasaysayan sa Davao.

Ang pagpangandam sa kapistahan ni Sr San Pedro nagsugod pinaagi sa pilgrimage, diin nagpahigayun ug Santos nga Misa sa matag sona diin mibisita ang atong mahal nga patron, inubanan sa mga myembro ug GSL, ug niadtong Hunyo 20 gisugdan ang Novena Masses nga natapos sa Hunyo 28.

Usa sa mga aktibidad nga gihimong kalihukan mao ang Dinner for a Cause, ika-upat nga fund-raising nga gipanguluhan sa Finance Committee ug sa Parish Pastoral Council para sa total repair sa parish façade. Ang maong kalikuhan gipahigayon sa RSM Event Center sa Philippine Women’s College of Davao, diin nagpasundayag sa ilahang talento sa pag-awit ang mga kaparian, inubanan sa Corde band. Nagpahigayon usab ug Baptismo niadtong Hunyo 28, nga gisundan ug prosesyon sa mga patron sa matag GKK sa alas tres sa hapon.

Human niini, gipahigayon ang ika 44th Dedication of the Metropolitan Cathedral nga giapilan sa Hijos de Davao ug ang Religious Night.

Usa pa ka makasaysayan nga panghitabo ang pag-ordina sa pagkapari sa walo ka diyakono nga maoy misugod sa adlaw sa kapistahan. Ang alas nwebe nga Santos nga Misa gidumog pag-ayo ilabina sa mga parokyano sa St. Francis of Assisi, San Pablo, San Roque, Holy Family, San Antonio, St. Jude ug St. Mary.

Ang ordinasyon nil ani Rev. Fr. Soren Abellanosa, Rev. Fr. Alcris Panganiban, Rev. Fr. Ritzchild John Cariaga, Rev. Fr. Junel Bustamante, Rev. Fr. Cecilio Canico, Rev. Fr. Amiel Arado, Rev. Fr. Julius Lugay ug Rev. Fr. Angelo Espinas dako kaayong kadaugan sa simbahan dili lang tungod atol kini sa kapistahan ni San Pedro ug San Pablo ug diha sa ika-75 nga anibersaryo sa Arkidyosis apan sa timaan sa buhing bokasyon ug pagtoo sa mga katawhan sa Dios.

Ang kapistahan sa Parokya nahuman sa PaghiuSayaw 2024 nga gipahigayon sa San Pedro Square. (Rosalinda Jabonillo and Dessa Caballero | Photos: DCH and SunStar FB Page)