Marian Procession gihalad alang sa pag-usab sa hunahuna sa nagpasiugda sa Divorce Bill karon

May 25, 2024, 3:30 sa buntag. Nagkatapok ang mga miyembro sa Archdiocesan Council of the Lay Apostolate and Integrated Movements (ACLAIM) sa NCCC VP Carpark, Bajada, Davao City alang sa Archdiocesan Marian Procession.

Sa mga Pulong-Pasiuna ni Fr. Marbendear Morallas, Episcopal Vicar for the Lay, siya miingon: “In this particular procession, we pray for the intentions of the Holy Father, for the 75th Anniversary of the Local Church of Davao, and we especially pray for every Filipino Family… padulong na ma approve ang Divorce Bill. We ask the intercession of the Blessed Mother to change the heart of the initiators… we pray for all Filipinos, to once again renew our commitment to protect the sanctity of marriage, family, and sanctity of life…”

Adunay 17 ka mga imahe sa Mahal nga Birhen ang miduyog ug kapin kinyentos ang katawhan nga miapil.

Matud pa sa usa ka miyembro sa Divine Mercy Apostolate gikan sa St. James Vicariate nga si Estela Ramos, “naga apil ko niining Marian Procession kada tuig ug akong personal nga gihalad ang akong sakripisyo alang sa kalinaw sa kalibutan, good health sa mga kaparian, ug alang sa kaluwasan sa mga kalag sa purgatoryo.”

Niini nga prosesyon, gisugdan ang pag-usab sa oras sa pagpahigayon niini. Sa pila na ka katuigan, gihimo kini sa hapon. Matud pa ni Fr. Morallas, “ nag change kita sa time kay basig makuyapan na ta’ng tanan ugma tungod sa kainit na sa panahon…”

Gitapos ang Marian Procession pinaagi sa usa ka Santos nga Misa sa San Pedro Cathedral pinangulohan ni Fr. Morallas ug giubanan nila ni Fr. Archimedes Lachica, SJ, Episcopal Vicar for the Religious ug ni Fr. Tony Martin Basilio, SJ, Local Superior of the Jesuit community in Davao. (Vicky Estoque Anghag)