Ayaw Kahadlok, Salig sa Ginoo

Ika-12 nga Domingo sa Ordinaryong Panahon (June 23, 2024)
Job 38:1, 8-11 / Ps. 107:23-24, 25-26, 28-29, 30-31 / 2 Cor 5:14-17 / Mk 4:35-41

ANGAY BA KITANG MAWAD-AG PAGLAOM SA PANAHON NGA KITA ADUNAY DAGKONG SULIRAN? Sa dihang gikuso-kuso sa dakong unos ang ilang sakayan, ang mga tinun-an mituwaw sa makusog, “Ginoo, wala ba ka mabalaka nga hapit na kita malunod?”

Dili ba ingon man usab niini ang atong buot ipangutana sa Dios kon adunay mga dagkong problema nga muabot sa atong kinabuhi? Taliwala sa mga suliran, gusto kitang masayod kon ang Ginoo nagpakabana ba sa atong kahimtang.

Naa na gyud na sa tawo nga gusto siya nga perminte tabangan sa atong Ginoo. Mao bitaw’ng kung makasinati na gani ug dili maayo nga kasinatian, manglood dayon sa Ginoo o di kaya pangutan-on dayon ang Ginoo – naa ba ka diha? O gipasagdan rami nimu? Buhi pa ba ka? O gi-atik rami nimu? Mao ba gyud ni ang among kinabuhi? Daghan kaayo tag pangutana sa Ginoo.

Pero syempre usa raman gyud ang gusto sa Ginoo nga atong buhaton diha kaniya bisan luyo sa atong kahuyang. Unsa man kadto? Mao, ang atong dakong pagsalig diha kaniya. usahay o kanunay kitang way salig sa Ginoo, mao nga nindut kaayo ning giingon ni Jesus sa iyang mga tinun-an nga makatabang usab kanato. “Nganong nalisang man kamo? Wala ba kamoy pagsalig?”

Kining ebanghelyo magpahinumdum kanato nga kontrolado sa Ginoo ang tanan ug dili kita angay’ng mahadlok. Adunay nag-ingon, “When you feel like drowning in life situations, don’t worry. Your lifeguard walks on water.” Busa sa kataposan, salig kita kanunay sa Ginoo, luyo aning atong di masabtan nga kahimtang hupti gyud kanunay ang gugma ug pagsalig sa Ginoo, tungod kay kini lang ang makatabang kanato nga makaabut sa gingharian sa Ginoo. (Rev. Ranie Boy Pamplona)