Wala kita nag-inusara

Gisaulog sa GKK Queen of Peace sa Nova Tierra ang ilang ika-34 nga kapistahan niadtong Mayo 13, 2024, adlawng Lunes nga mao usab ang adlaw sa unang pagpakita ni Sta. Maria sa Fatima. Usa ka thanksgiving Mass ang ilang gipahigayon sa ala sais y media sa buntag. Sumala pa ni Sol Tiu nga mao ang GKK SoCCom, isip GKK nga ilawom sa St. Joseph the Worker Parish, ila usab nga gipahiangay ang mga aktibidades subay sa parokya. Matag gabii sila dunay mga gipahitabo nga subay sa tema sa pito ka lat-ang sa mga gasa sa Dios sama sa: vocation, temporality, ecology, faith ug service. Usa na niana ang pagpahigayon ug poster making sa mga kabatan-onan nga nagsentro sa pag-amping sa kinaiyahan.

Sulod sa Santos nga Misa nga gipangulohan ni Rev. Fr. Leonardo “Bong” Dublan, Jr. kauban si Fr. Primo Fagel, MJ ug Rev. Ranie Boy Pamplona, gipunting ni Fr. Bong ang mga hiyas ni Sta. Maria nga angay pamarisan sa mga miyembro. Kini kuno nga mga hiyas, makadala kanato sa tinuod nga kasiguraduhan. Sumala pa ni Fr. Bong normal lang ang mga pagtay-og sa pagbati, mga kalisdanan tungod kini ang mupalawom ug magpaligdong sa atong pagtoo.

Tungod kay ang binasa naghisgot diha sa pagbiya ni Jesus, siya mipahinumdom nga dili angay nga maghunahuna nga kita nag-inusara tungod kauban nato ang Dios. Gani sa mga suliran dili kita makaingon nga kita gipasagdan tungod una, gipadala sa Amahan ang Iyang anak aron nga sination ang atong mga kasakit ug ang ika-duha gibilin pud kanato ang Espiritu nga maoy maglipay ug mugiya kanato.

Sa iyang panapos, sigon niya, “we can only be contented in life if we know who truly we are, where we come from.”

Hinaot pa unta nga dili gyud kita makalimot sa atong pagka-anak sa Dios, ug nga kita gisaaran sa kaluwasan.

Daghang salamat sa atong mga mission partners nga mipaambit sa ilang mga gasa alang sa mabulokon nga live streaming sa DXGN 89.9 Spirit FM.