Saulogon ta ang iyang kinabuhi

Mipanaw na ngadto sa sabakan sa Ginoo ang Kura Paroko sa San Roque Parish-Malabog nga si Reberendo Padre Arnold A. Balaquinto niadtong Mayo 20, 2024, adlawng Lunes sa kahaponon.

Sa tumang kasubo, nagpadayag sa ilang gibati ang tibuok Arkidyosis sa Dabaw hilabi na gayud ang mga parokyano sa San Roque Parish-Malabog kinsa mga buhing saksi sa iyang pagpanerbisyo sa simbahan. Dayag sa social media ang mga libuan nga netizens nga nagpadayag sa ilang pagkasubo sa panghitabo, kalakip niini mao ang mga kalipay nga gipaambit ni Fr. Arnold, pagtulon-an nga iyang gibilin ug ang mga pasalamat sa iyang kaayo sa buhi pa siya.

Si Rev. Fr. Arnold A. Balaquinto mao ang ika-upat sa pito ka mga anak ni Mr. and Mrs. Minda and Modesto Balaquinto Sr. Siya nailhan sa kadaghanan sa iyang kinasing-kasing nga pagpaningkamot mapaduol sa Ginoo ang katawhan. Siya miamuma sa iyang parokyano sa espirituwal ug lakip na sa pinansyal nga aspeto. Ang iyang pakigrelasyon isip pari wala mahuman diha sa Santos nga Misa, siya magpabilin nga higala ug pamilya bisan paman gawas na sa simbahan.

Kasagaran sa iyang mga oras gigahin alang sa pag Misa sa 58 ka GKK sa parokya. Moinit man o mo ulan, motabok man og sapa ug mobaktas sa kabukiran. Tungod niini daghan ang nadasig, nadani ug nakaamgo, hinungdan nga sa iyang pagkawala daghan ang nasakitan ug nibakho.

“Hunahunaon nalang namo Dre nga naa raka ra parokya, nag atiman sa mga parokyano”, si Razel Edaño, kanhing Zone 3 Youth Coordinator, kinsa usa sa mga nakasinati ug nakasaksi sa dedikasyon ni Padre sa iyang bokasyon.

Dili sayon ang mawad-an og mahal sa kinabuhi. Mingawon man gani ta sa mga temporaryong nalayo lang sa atoa, samot na si Padre nga hangtud sa hangtud dili na nato madungog pa ang iyang mga katawa.

Sa laing bahin, ang kamatayon ni Padre angayang pasalamatan, kay nahuman na ang iyang misyon diri sa kalibutan. Dili na nato siya makita nga nasakitan. Siya makakuha na sa ganti sa kinabuhi nga walay katapusan. Aduna nay gitagana nga luna ang Ginoo ngadto sa Iyang gingharian. Tungod kay didto sa langit, magmalipayon na si Fr. Arnold sa kamot sa atong Ginoo.

Sa kanunay, dalaygon ang Dios!

(Jozeil Crodua – SoCCom)