Pray the Rosary

“Pray the rosary,” mao kini ang nahimong tema sa milabay nga Festival of Children ug Archdiocesan Flores de Mayo niadtong miaging Sabado, Mayo 4, 2024 didto sa St. Francis Xavier Regional Major Seminary of Mindanao Gym.

Traynta’y syete (37) sa kwarenta’y dos (42) ka mga Parokya ang mipadala sa ilang mga delegado nga mga kabataan nga mikabat sa kwatro sientos saysenta’y-dos (462). Baynte-dos (22) ka mga bata usab ang gikan sa Kids for Christ. Ang mga hamtong miabot sa dos syentos traynta’y-sais (236). Ang kadaghanon sa mga misalmot niining panagtigom, usa lamang sa daghang mga rason sa pagkamalipayon sa tanan.

Tungod kay sayo naabot ang kadaghanan sa mga delegado, sayo usab nga nagsugod ang programa pinaagi sa pag-ampo nga gipangulohan ni Mrs. Victoria Anghag, Lay coordinator sa Basic Ecclesial Communities (BEC) dinhi sa Arkidyosis sa Davao. Matapos usab ang mainiton nga pag-abi-abi sa BEC Director nga si Fr. Pedro Lamata, sa mga kabataan, wala gipakyas sa worship team gikan sa Kids for Christ ang masadya nga pagkanta nga gipakapinan sa animation para sa mga bata.

Usa ka video ang gipalabas isip pinakasentrong bahin kon diin nag-gikan ang mga hilisgutanan. Kini mao ang pagsaysay sa pagpakita sa Mahal nga Birhen diha nila ni, Jacinta, Lucia ug Francesco didto sa Fatima.

Matapos ang maong palabas, dunay question and answer nga gipahitabo diin gi-awhag ang mga kabataan sa pagpaambit sa ilang mga nakat-onan nga gibayloan sa mga papremyong dulaan ug pagkaon.

Kadaghanan gyud sa mga kabataan nga gipangutana, mitubag nga ang dili nila hikalimtan nga mga pulong gikan sa maong video mao ang pag-ampo sa Santos nga Rosaryo. Sumala pa ni Aisha Dawn, “si Mama Mary niadto siya sa mga bata kay tungod nangadye sila, nagpray sila’g rosary, tung nagpray sila’g rosary, na happy si Mama Mary so kaya nibaba siya sa earth.”

Sa mensahe usab nga gihatag ni Papa Francisco alang sa mga kabataan sa tibuok kalibutan, siya mihangyo diha sa paghimo sa kalibutan nga mas maayo bisan sa inanay nga mga lakang. Sa laing bahin, siya usab mihatag sa tulo ka mga pulong nga bililhon nga mgpabilin sulod sa panagtigom nga mao ang: “please, thank you ug sorry.” Kini gihatagan gyud ug duso sulod sa pagtigom, mugbong mga pulong apan kung kinasing-kasing nga gamiton, magdalag kalipay ug kalinaw sulod sa panimalay.

Human sa programa, gisunod dayon ang paghalad sa mga bulak ngadto sa nagkalain-laing mga imahe ni Birhen Maria, uban sa mga maanindot nga paghalad sa mga awit alang kay Maria. Pipila ka minuto una ang Santos nga Misa, gipalinya ang tanang katekista sa atubangan ug gihatagan sa mga souvenir pins nga dunay logo sa Diamond Jubilee sa pagsaulog sa anibersaryo sa Arkidyosis, kini makahuloganon nga gitaod sa dughan sa mga kabataan isip timaan sa ilang paghigugma ug pag-amping diha kanila. Dayun ug gakos sa mga kabataan ngadto sa ilang mga katekista. Pagkanindot nga larawan.

Human niini misunod ang Santos nga Misa nga gipangulohan ni Most Rev. George Rimando, D.D. Auxiliary Bishop sa Arkidyosis sa Davao. Sa iyang pamalandong, siya mipasibaw sa labing importante nga kamatuoran nga kini nga mga kabataan ug ang tanang mga kabataan sa kalibutan pinalangga sa Dios. Pagkanindot nga maayong balita, ang atong pagsalig niini nga mga pulong magdala kanato sa maayong dalan. Ang mga misalmot sa maong Festival, nabusog dili lang sa pagkaong kalibutanon, apan apil sab ang pagkaon sa kalag, sa pasalig sa Dios nga ang tanan dili gayud niya pasagdan.