Pagpuyo ug Pagtuman sa Diosnong Misyon

“PAGHIGUGMAAY, KAHIUSAHAN, PAGTINABANGAY MAOY MISYON UG KASUGU-AN SA MGA SINODONG MGA PINIYALAN SA DIOS UBAN SA PANGAMA NI SAN VICENTE FERRER”, mao kini ang tema sa pagsaulog sa ika-67 nga tuig nga kapistahan sa Gagmay’ng Kristohanong Katilingban (GKK) San Vicente Ferrer, Balite, Buhangin. Usa ka tema nga adunay daghang ipasabot ngadto sa katawhan. Ang pagpuyo sama sa Diosnong kina-iya dili sayon, sanglit mga ordinaryong tawo lamang kita, nga adunay mga kahuyang. Apan kung adunay lig-on nga paghigugmaay, kahiusahan ug pagtinabangay diha sa Dios, kita mamahimong lig-on usab taliwala sa bisan unsang pagsulay ang moabot sa atong kinabuhi.

Sama sa atong Patron San Vicente Ferrer, nga sa iyang pagpakiglambigit, pagpuyo ug pagtuman sa Diosnong misyon, wala niya gitagad ang mga posibling kalisod nga iyang masinati. Gani iyang gitalikdan ang iyang kinabuhing haruhay diin andam sa pagsunod sa Diosnong kasuguan, taliwala sa kalisod, andam sa pagtabang sa mga nanginahanglan. Ang mga GKK Servant Leaders (GSLs) ug Miyembro sa katilingban nagalaum nga pinaagi sa mga hiyas ni San Vicente Ferrer, magmadasigon sa pagpakiglambigit, pagpuyo ug pagtuman sa Diosnong misyon; nga andam dawaton ang mga kalisdanan nga maagian sa umabot.

Ang GKK San Vicente Ferrer, Balite nga kabahin sa Zona 7, nga nahisakop sa St. Mary of the Perpetual Rosary Parish Buhangin, Davao City, gisaulog ang ika-67 nga tuig sa kapistahan niadtong Abril 25, 2024 diin gisaulog ang Santos nga Misa sa alas 6:00 sa buntag nga gipangulohan sa Kura Paroko, Rev. Fr. Dionisio Tabiliran ug inubanan sa Diakono na si Rev. Angelo Espinas.

Agi’g pagpangandam sa kasaulogan sa kapistahan, adunay siyam ka gabii nga pagrosaryo ug pagnovena. Sa ika siyam ka adlaw gihimo ang pag prosisyon palibot sa katilingban sa alas 4:00 sa kadlawon.

Niining tuiga adunay gipahigayon nga mga cultural presentation ug sports sama sa basketball ug volleyball aron mahiusa ang mga miyembro sa katilingban ni San Vicente Ferrer. Pinaagi niining mga kalihukan mapakita ug makita sa mga batan-on ang tinood nga diwa sa kahiusahan, pagtinabangay ug “sportsmanship”. Kining tanan nahimong nagmalampuson tungod sa nagkahiusang mga miyembro ug GSLs ug labaw sa tanan tungod usab sa giya ug tabang sa atong Ginoo, pinaagi sa pangama ni San Vicente Ferrer nga among patron.

Ang pagsaulog sa Kapistahan ni San Vicente Ferrer maoy timaan sa among dakong pagtoo ug pagkamalaumon sa atong Ginoo. Pinaagi sa iyang mga hiyas mamahimo unta kini namong inspirasyon ug rason sa pagpadayon sa pag-alagad kaniya. Nga sa kanunay magmadasigon sa pagpakiglambigit, paghigugmaay, pagtinabangay, pagtuman sa Diosnong Misyon, alang sa pagkab-ot sa Kahiusahan ug Kaangayan diha sa Katilingban. (Michelle dela Cruz, GKK SoCCom/SVF Balite)