Kasadya Uban Ni San Isidro Labrador

Nahimong masadyaon ug mabulukon ang pagsaulog sa ika-25 nga kapistahan sa parokya ni San Isidro Labrador sa Catalunan Grande ubos sa tema: “Ika-25 ni San Isidro: Uban sa mapadayunong panaw sa Simbahan Pagkapiniyalan Padayong hagit sa katawhan.”

Tataw kaayo nga makita sa mga gipahigayong mga kalihokan sa kapistahan ang padayong ginasaulog sa simbahan nga Synod on Synodality kung diin ang mga kalihokan ug mga pasundayag gisalmotan gayud sa mga bata, kabatan-onan ug mga hamtong nga mga parokyano. Highlight sa mga kalihokan mao ang PANAW-DUAW nga gipahigayon sa 5 ka mga Dominggo alang sa 5 ka sona nga sakop sa Parokya, ang GABII SA MGA PASUNDAYAG nga sa matag gabie sukad Mayo 3 hangtud Mayo 10, gipahigayon usab ang pinaka-unang SAYAW-SANGYAW SA PASALAMAT FESTIVAL NI SAN ISIDRO kon indak-indak ni San Isidro kun asa ang lima ka sona mipakita sa ilang mga talento sa pagsangyaw ug pagpasalamat pinaagi sa pagsayaw halad ngadto kang San Isidro ug nahimong mananaog ang sona 5, gihatagan usab ug dakong pagtagad pinaagi sa GABI NG PARANGAL NI SAN ISIDRO ang mga prime movers 25 katuig na ang nilabay hinungdan sa pagkatukod sa parokya. Lakip sa mga gipanggantihan ang mga nahimong mga Kura Paroko, mga nahimong mga diyosisanong mga Pari nga sakop sa parokya.

Aduna puy gihapahigayong PAYAG NI SAN ISIDRO kon booth making contest nga aktibong gisalmotan usab sa lima ka sona ug ang nahimong mananaog mao ang Sona 4. Sold-out usab ang fund raising event sa parokya kon 25 HALAD KO KANG SAN ISIDRO Raffle Ticket kung diin adunay 25 ka mga winner sa 25 kilos nga bugas ug 25 ka winners sa tag 250 pesos. Sa espiritual nga bahin gipahigayon usab ang pag-ampo sa novena alang kang San Isidro ug gitapos kini sa Santos nga Misa niadtong Mayo 11, gipahigayon ang solemne nga prosesyon nga gisalmotan sa mga parokyano sa parokya bitbit ang mga patron sa 40 ka mga Gagmay’ng Kristohanong Katilingban (GKK). Nahimo pa gayud nga masadyaon ang pagsaulog sa kapistahan tungod sa upat ka selebrasyon nga highlighted atol niadtong adlawa: una-kapistahan sa pagsaka sa Ginoo sa Langit (Ascension of the Lord), kapistahan ni San Isidro Labrador, pagsaulog sa adlaw sa mga Inahan (mother’s day), ug ang World Communications Sunday kung diin padayong hagit sa tanan nga mamahimong mga maayong mga magsasangyaw sa maayong balita.

Pinanguluhan ni Rev. Fr. Max Bahinting mapasalamaton kaayo ang tanan nga nahimong malinawon, masadyaon ug mabulukon ang pagsaulog sa ika-25 nga kapistahan ni San Isidro Labrador.

Viva San Isidro Labrador!

(Jerick Nash Nacion | Photos by Vergie Verbo Indiongco)