Balik Sa Parokya

Malipayong gipaabot sa mga parokyano sa Most Sacred Heart of Jesus Parish Calinan ang pag-agi sa sakyanan ni Most Rev. Romulo G. Valles, D.D. niadtong unang adlaw sa iyang Bisita Pastoral, Lunes, Mayo 13, 2024. Halos usa ka oras nga nagpaabot ang mga katawhan ilawom sa init sa adlaw tungod sa ilang kaikag nga mahimamat si Arsobispo Valles, apil ang kura nga si Rev. Msgr. Maximo Sarno.

Sa hamubong pakighinabi kang Bro. Dennis Del Fierro nga presidente sa Parish Pastoral Council siya mipaambit mahitungod sa ilang kahinam nga mga pagtulon-an, pagpaklaro, solusyon sa mga problema ug lamdag gikan sa Arsobispo. “Dako kaayong honor para kanamo nga gihatagan mig panahon ni Bishop niining maong Pastoral Visit,” sumala pa ni Bro. Dennis Dugang pa niya, siya nangandam pinaagi sa mga meeting uban sa ilang kura paroko ug nagplano sa mga butang nga gikinahanglang ipaabot sa Arsobispo sama sa mga bag-ong pamaagi sa pag-atiman sa mga pamilya tungod daghan na ang kabag-ohan karon. Atol niining pagbisita, gihandom ni Bro. Dennis nga matagaan siya dinha sa mga pamaagi kon unsaon pagpalambo sa pagtoo sa mga parokyano.

Sulod sa Santos nga Misa, mipaambit si Arsobispo Valles dinha sa mga pamalandong nga dunay kalambigitan sa Mahal nga Birhen Maria, tungod kay niadtong adlawa man usab ang kapistahan sa unang aparisyon sa Fatima, ngadto kang Lucia, Jacinta ug Francisco. Duna kuno’y tulo ka pagtulon-an nga atong makutlo diha kang Sta. Maria, una: ang atong dakong “OO” sa mga sugo ni Jesus, nga walay pagduha-duha sa pagsunod sa dalan sa kasakitan, ika-duha ang pagbuhat sa iyang mga gimando ug ang ika-tulo ang paghinumdom nga siya mao ang atong inahan, nga siya naunang nasakitan sa pagbiay-biay ug pagpalansang sa iyang anak ug luyo niining tanan, nagpabilin siyang masinugtanon, maantuson ug matinumanon sa mga plano sa Amahan.

Matapos ang Santos nga Misa, gipahigayon ang kolokoabildo kauban ang mga representate sa mga mandated organizations, public ug private schools ug apil sab ang mga men and women in uniform. Nagsagol ang kahibulong ug kalipay sa Arsobispo sa iyang pagkakita niining mga tawhana tungod kini nagpakita lamang sa tinuoray nga synodanhong panaw kauban ang simbahan.

Pipila ka mga respresentate sa ang nagpaambit sa ilang pasalamat sa parokya tungod kay binulan nga dunay Santos nga Misa ug katesismo ang napahigayon sulod sa 20 ka mga eskwelahan. tungod sa ilang kadasig sa pagpalapnag sa pulong sa Dios.

Misunod ang pagpaambit sa mga organisasyon sulod sa parokya, tuod man tanan sila may managlahi nga mga pamaagi sa pagsangyaw ug pormasyon labi na diha sa mga kabatan-onan aron mapalawom ang pagtoo.

Nalipay ang Arsobispo niini nga mga pagpaambit apan hagit niya, nga kining mga grupo unta magdala sa katawhan balik sa simbahan. Iyang gihinaot nga ang karisma ug mga pagtulon-an mamahimong pagmata sa mga miyembro sa pagsalmot ug pag-aktibo sa GKK ug sa parokya. Ulaw kuno nga lantawon, nga daghan ang mga organisasyon nga aktibo apan nagkagidlay ang GKK.

Isip magbalantay, siya nagbilin diha sa dakong hagit alang niining mga mitambong sa panagtigom nga tabangan ang simbahan sa pagsangyaw sa mga katilingban.

Una matapos, nagpaambit ug pasalamat si Msgr. Max sa Arsobispo ug apil sa mga mitambong sa tapok. Gi-benditahan ang mga rosaryo nga dala sa pastoral team, ug gipang apod-apod sa tanan.

Sa katapusan, ang parokya sa Most Sacred Heart of Jesus kuno taas nag naabtan busa taas pod ang hagit.