Ang Espiritu Santo

Pentecost Sunday (May 19, 2024)
Acts 2:1-11 / Ps 104:1, 24, 29-30, 31, 34 / 1 Cor 12:3b-7, 12-13 / Jn 20:19-23

Ang Pentecostes, mao ang panghitabo sa pagbubo sa mga tinon-an sa mga gasa sa Espiritu. Ang mga tinun-an nagtigom ug nagtinabangay alang ug para sa Gingharian sa Dios, ug tungod niini mitumaw ang usa ka institusyon. Ug kini gitawag karon nga “Simbahang Katoliko.”

Mao nga, karong adlawa giisip sa katawhan ang paghimugso sa Simbahang Katoliko. Kining pagkahimugso, nga usa ka gasa, adunay buluhaton. Ug unsa man kadto? Ang Simbahan nagpakita sa iyang kaugalingon isip ahente sa pagpasig-uli tali sa Dios ug sa tawo. Ang mga sakramento naghatag sa mga oportunidad, labi na ang Sakramento sa Pakig-uli. Sa atong paghinumdom niadtong makahuloganong adlaw sa dihang ang Espiritu gihatag sa mga apostoles, kita gipahinumdoman sa atong mga responsibilidad isip usa ka Simbahan nga gigasahan sa Espiritu.

Ang matag usa kanato, sa dihang gibunyagan kita gihatagan og daghang mga gasa. Ug sa panahon nga kita gi-kumpirmahan, kita gidihogan sa Espiritu ug gipaabot nga kini gamiton nato alang sa Gingharian sa Dios. Mao nang, makita nato dinhi kung unsa gyud ka importante ang sakramento sa kumpirma. Human sa Kumpirmasyon, nahimo kitang mga sundalo ni Kristo nga wala na mahadlok o mulikay sa mga daotan kondili nakigtagbo na niini ug nagdesisyon nga pildihon kining daotan pinaagi sa tabang sa Espiritu Santo.

Busa, ang usa nga adunay Espiritu kinahanglan nga buhi kaayo ug aktibo kaayo! Buhi tungod sa presensya sa mga gasa nga gihatag sa Ginoo diha kanato. Aktibo tungod sa panginahanglan sa pagyatak sa mga tentasyon ug pag-uswag sa yawa. Ang gubat dili lamang pisikal o materyal. Ang importante nga gubat mao ang espirituhanon nga gubat. Uban sa Espiritu, unta dili kita mag-inusara niana nga gubat, kon dili naa gyud ang Espiritu nga mao ang manlalaban, mugiya ug muprotekta kanato sa mga gubat o kalisdanan. (Rev. Ranie Boy Pamplona)