Tinuig nga Pagsaulog sa Diosnong Kalooy

Ang kapistahan sa Diosnong Kalooy ginasaulog matag ikaduhang Dominggo sa Pagkabanhaw nga giproklamar ni San Juan Pablo ll.

Ang Apostolado sa Diosnong Kalooy dinhi sa Archdiocese sa Davao pinanguluhan sa atong maabtikonng Archdiocesan Lay Coordinator nga si Sis. Joji Ilagan Bian mapasigarbohong moimbita kanatong tanan sa pag-apil niining atong kapistahan karong Abril 7, 2024 uban sa tema “Diosnong Kalooy: Sumbanan sa Atong Panaw Isip Mga Piniyalan Nga Manggihatagon, Mapasayloon ug Mapasalamaton sa Mga Gasa sa Dios.”

Ang Misa pagasaulogan sa alas 3:00 sa hapon sa San Pedro Cathedral nga pangulohan sa halangdon nga Arsobispo sa Davao si Most Rev. Romulo G. Valles, D.D. inubanan sa mga kaparian dinhi sa atong Archdiocese sa Davao. Pagkahuman sa misa adunay ipahigayon nga prosisyon nga maggikan sa San Pedro Cathedral paingon sa C. M. Recto St. (Claveria), Bonifacio St., Gen. Luna St., Quirino Ave., Magallanes St. ug mobalik sa San Pedro Cathedral.

Sa naandan gipahigayon usab ang Novena Mass pinaagi sa usa ka panaw-duaw ngadto sa nagkalain-laing Parokya dinhi sa atong Archdiocese nga gisugdan sa ika-upat nga adlaw sa Novena. Ang una hangtod ikatulo nga Novena gihimo sa tagsa tagsa ka panimalay kay hugot nga giawhag sa Arsobispo sa Davao nga mo apil gayud ang tanan isip mga Katolikong Kristiyano sa PASCHAL TRIDUUM Celebration sa Simbahan.

Ang Divine Mercy Apostolate sa Archdiocese sa Davao nag-awhag sa tanang mga Katoliko sa pag-apil sa mga kalihukan sa pagsaulog nato sa kapistahan sa Diosnong Kalooy. (Sylvia G. Orbeta | Priestly Ministry Coordinator)