San Roque Parish: Ang Saysay sa Batan-on ug Babayeng Apostol

Adunay managlahi nga pamaagi ang pagtawag sa Ginoo kanato, usa niini ang mamahimong usa sa mga apostol panahon sa Semana Santa, ug niining tuig 2024 gikasabutan sa PPC members sa San Roque Parish nga gipangulohan ni Rev. Fr. Cirilo O. Bermudez – Parish Administrator nga maggikan sa matag Ministiya ang mga Apostoles karong tuiga ug kini mao sila Mervin Madijanon-PSK, Wendell Delgado ug Dennis Luisen-PSL, Elenita Saplad ug Rosalinda Cabania-PSP, Edgar Perales ug Morris Estrobo-PSA, Elmo Sevilla ug Rey Villarmia-PSKB, John Paul Cartagina, John Eduard Cartagina ug Leigh Jayvryll B. Joromat-PSB.

“Akong nabati ang tawag sa Ginoo nako, ug mi “oo” ko sa walay pag duha-duha”, si John Eduard Cartagena, usa ka batan-on gikan sa GKK Inahan sa Kanunayng Panabang sa sona 10 sa maong parokya sa pangutana mahitungod sa rason sa iyang pag-apil, “Ang Ginoo nagpakamatay tungod sa Iyang dakong gugma sa Iyang mga katawhan. Apil na ako sa Iyang gipakamatyan busa nganong usikan man lang nako ang panahon sa mga butang kalibutanon. Angay gyud nga Siya akong hatagan sa akong kaugalingon. Dili man ko perpekto apan sa gihapon naningkanot nga moduol sa Ginoo,” pulong niya.

“Lipay kaayo ko nga nahimo ko nga isa sa mga apostoles. Nindot kaayo akong nabati… lipay ug gaan kaayo ang pamati nako mura ko ug naibtan ug tunok. Ang dugay na nako nga gipangandoy nga mupas-an ug krus natuman na.”, matud pa ni Sis. Elenita Saplad, babayeng apostol, usa ka PSP gikan sa GKK San Vicente Ferrer – Crossing sa sona 2.

Matag usa kanato adunay tawag busa angayan lamang nga abli kanunay ang atong mga kasing-kasing sa pagpaminaw og pagdawat niini, sama ni John Eduard Cartagena kinsa wala nagduha-duha sa pagtugyan sa iyang kaugalingon ngadto sa buluhaton sa simbahan luyo sa iyang pagkabatan-on.

Ug sama ni Sis. Elenita Saplad tinguhaon unta nato nga moambit sa kasakit ni Kristo hilabi na panahon sa Semana Santa, kay siya nangandoy nga mopas-an sa Krus luyo sa iyang pagkababaye og taliwala sa kabug-at sa Krus, siya mipadayag sa iyang pagpasalamat kay ang pagpas-an diay sa Krus alang kaniya usa ka mahinungdanon nga prebilihiyo nga mopapas sa kabug-at nga nabati sa iyang kasing-kasing.

Lahi-lahi ang atong kapasidad ug kaya buhaton, ug ang atong pagpadayag niini ngadto sa atong Labawng Makagagahom mao ang maghatag og kahingpitan sa atong pagtubag nga mamahimo Niyang alagad.

Sa kanunay dalaygon ang Diyos.

(Jozeil Crodua – San Roque Parish SoCCom)