Mr. HIV

Dear Ate Emz,

Itago na lang ako sa ngalang Mr. HIV. Weird apan yes, positibo ako sa maong sakit. Usa ako ka Marino. Ulitawo pa, 30 years old and 3yrs na naga trabaho sa barko.

Niaging tuig pa nako nasayran nga positibo diay ako sa HIV sa dihang mikanaog ako kay nahuman na ang akong kontrata ug sa pagtiwas sa mga gikinahanglang training alang sa sunod nakong pagatrabahoan. Wala pa una ako miuli sa akong lugar nga natawhan kay gihuman ko una ang training sulod sa usa ka bulan didto sa Luzon. Samtang naga training medyo dunay naipon mao nga enjoy kauban ang mga ka trabaho. Laag diri, inum didto, gimik kung asa gusto. Kampante sab ako kay dunay nagapaabot nga trabaho hangtud nga ma kumpleto ang gikinahanglang requirements.

Miabot ang higayon nga usa sa mga importanteng rekisitos sa pagpanarbaho ilabi na sa amoang mga marino, ang medical check-up. Dako na kaayo ang akong kalipay kay hapit na ako mubalik sa pagsakay ug pipila na lang ka adlaw mahuman na ako sa training. Anaa kadto bulan sa Marso sa dihang nagpa medical ako. Nahibulong ako kay duha ka beses ako nga gikuhaan og dugo. Diay to sa una pa lang nakitaan na og dili maayo. Ug aron sa pag kumpirma gipausab sa ika-duhang higayon ug didto positibo gayud ang resulta. Dili ako maka too kay basin sipyat lang mao nga nagpa second opinion ako sa laing laboratory ug mao gihapon ang resulta.

Grabe ang akong kasubo niadtong tungura nga murag ni blackout ang akong huna-huna. Wala na akoy dagway nga ika atubang sa akong mga ginikanan tungod sa akong binuhatan. Imbes nga okay na unta ang tanan kong hinaguan na hanaw lang ang tanan sa usa ka sipyatan lang. Nakahuna-huna na gani ako nga tapuson ko na ang akong kinabuhi, maayo na lang nga dunay programa ang pang gobyerno sa mga sama nakong HIV positive.

Sa kasamatangan, nia ako sa among probinsiya kauban akong pamilya, mga igsoon nga nag amuma sa akong sitwasyon. Salamat sa ilang pagsabot ug pagdawat kanako isip kabahin sa pamilya. Anaa ako ubos sa pag monitor sa pang gamhanan ug duna sab mga counseling nga ginapahigayon sa sama nakong anaa sa mapait nga sitwasyon.

Hinaut nga magsilbing leksyon sa mga tawo nga walay pagpakabana sa ilang kaugalingon labaw sa tanan sa isig ka ingon.

Mr. HIV

* * * * * *

Dear Mr. HIV,

Kining imong pagsulat usa ka gesture of humility sa imong kabahin tungod nakahimo ka sa paggawas sa imong kaugalingon aron mapaambit kung unsa ang ginaisip sa uban nga kangitngit nga bahin sa ilang kinabuhi. Sa pagkatinuod, usa kini ka hagit sa pagsukol sa “temptations of the flesh” nga ginasagubang sa mga seafarers sama nimo. Layo mo sa inyong mga mahal sa kinabuhi ug usahay tungod daghan mo og kwarta, ang tentasyon dili mapugngan. Ug ikasubo kaayo mahibal-an nga ang tanan maguba ra lakip ang imong maayong kahimsog. Kung ikaw adunay ing-ani nga sakit, usahay giisip kini nga usa ka “death sentence”. Ang HIV (Human Immunodeficiency Virus) moataki kini sa immune system sa lawas. Kon dili matambalan, mahulog kini sa AIDS (Acquired Immunodeficiency Syndrome), ug sayon alang kanimo nga magkasakit.

Usa ka sikat nga pari kaniadto nag-ingon nga “ang kalipay mao ang hunghong sa Diyos, ang kasakit mao ang Iyang singgit kanato”. You see, we are the products of our own decisions and choices in life. Tingali sa una, nahilayo ka sa atong Ginoo hangtud nahisalaag samtang nag enjoy- enjoy ka sa imong kinabuhi. Mao to nga nisinggit na Siya aron makabantay ug makaamgo ka sa Iyang presensiya. Sa kasamtangan, nagatoo ako nga ang imong kahimtang karon nakapaduol na kanimo sa Kapitan sa imong kalag, nga walay lain gawas sa atong Ginoo mismo.

Naka realize ka na ba kung unsa kadako ang gugma sa atong Ginoo kanimo? You see, dili gyud Siya gusto nga malumos ka sa sala mao nga gibira ka Niya gikan sa kana nga kalibutan. Salamat ug gilugwayan pa Niya ang imong kinabuhi aron naa ka pa higayon nga mobalik sa Iyang sabakan. Sigurado nga naa pa gyud Siya ipabuhat kanimo. Busa, pahimusli kining imong sitwasyon karon ug sulayi ang pagpamalandong kung unsa gyud ang Iyang plano alang kanimo.

Samtang nag-atubang ka sa mga sangputanan sa imong mga nangaging choices sa imong kinabuhi, usahay naay mga higayon sa pagmahay, o pagbasol sa imong kaugalingon. However, don’t wallow in all these but have a positive outlook. God is merciful, compassionate and forgiving. Tungod niini, hinaot nga makapahimulos ka sa Sakramento sa Pakig-uli, ingon man sa Sakramento sa Eukaristiya aron madawat nimo ang mga grasya nga imong gikinahanglan aron masustener ang imong panaw sa hustong dalan nga imo nang gisubay.

Ang imong health condition mahimo’g wala pay tambal. Apan bisan wala pay tambal kini, sa laing bahin, makasiguro ka nga gialimahan ang imong espirituhanong kinabuhi. Mao gyud kini ang labing importante. Hinumdumi, ang Ginoo dili gyud mubiya kanimo. With your fervent prayers and trust in Him, He will always stay with you. Ipadayon ang pagsustener sa imong espirituhanong kinabuhi pinaagi sa imong kanunay nga pagkonektar Kaniya, samtang imong gipaubaya ang imong kahimtang, aron nga magdala kanimo nga labi pa ka suod Kaniya. This is all that matters.

Sa laing bahin, basin giimbitar ka sa atong Ginoo nga mahimong PRAYER WARRIOR alang sa ubang mga marino sama nimo…nga ang atong Ginoo maghatag kanila sa gikinahanglang kaisug ug mga grasya aron magpabiling lig-on batok sa temptations of the flesh. Kini mahimo nga usa sa imong misyon sa kinabuhi. Uban sa imong mga pag-ampo ug mga sakripisyo, makatabang ka nga ibalik sa hustong dalan ang mga nasaag nga mga kalag. Dugang pa niini, kanunay nga maghangyo sa pagpataliwala ni Mama Mary, ang Bitoon sa Dagat, aron mapanalipdan sa ilawom sa iyang kupo ang tanan nga mga marino sa tibuuk kalibutan, batok sa kadaot ug uban pang katalagman. Hinaut unta.

God bless you more and may your tribe increase.
Ate Emz