GKK San Vicente Ferrer, 2 Dekada Na!

Puno sa kalipay ug pasalamat, gisaulog sa mga miyembro sa GKK San Vicente Ferrer, Rosalina Village 3, Baliok nga sakop sa Parokya sa Sagrada Pamilya ang ika-20 nga kapistahan niadtong Abril 6, 2024.

Ang kapistahan gipangandaman pinaagi sa nobena matag gabii nga gisundan sa Kasaulugan sa Pulong nga kanunay gitambungan sa mga sakop sa GKK. Gipahigayon palibot sa katinglingban ang prosesyon sa patron, Sr. San Vicente Ferrer una ang katapusang gabii sa nobena. Dugang sa pagpangamdam nga espirituhanon, nagpahigayon usab ug mubo nga katesismo mahitungod sa tema ug sa kinabuhi ni San Vicente Ferrer. Kini gihatag ni Annirose Villarba, usa sa mga formators sa parokya ug miyembro usab sa maong GKK.

Ang misa sa pista gipahigayon sa 9:00 sa buntag nga gipanguluhan ni Fr. Roger Duhaylungsod, kura-paroko sa Sagrada Pamilya inubanan ni Reberendo Cecilio Canico nga maoy naghatag sa homiliya. Siya nagpasabot sa mga hiyas ni San Vicente Ferrer isip magsasangyaw alang sa kabag-uhan sa katawhan sa Dios. Gihagit usab niya ang mga miyembro sa GKK sa paglambo ug pag-usab alang sa tinuod nga kabag-uhan pinaagi sa buhat ug dili lamang sa pulong aron mahilayo sa pag-antos sa walay katapusang silot nga kasagarang unod sa wali ni San Vicente.

Paghuman sa Santos nga Misa, adunay salo-salo alang sa mga katawhan. Nalipay usab ang mga kabataan nga nakadawat ug mga lootbags ug giveaways isip kabahin sa selebrasyon.

Dako kaayo ang pasalamat sa mga GKK Servant Leaders sa mga miyembro nga padayon sa paghatag sa ilang suporta labi na gayod sa panginahanglan sa kapilya. Ang tanan nanghinaot nga mulambo pa gayod ang GKK sa umaabot nga katuigan uban sa pangama sa patron, San Vicente Ferrer.

Lakip usab nga gipasalamatan ang Coverage Team sa 89.9 Spirit FM nga pinaagi kanila nasibya ang misa aron kini makaabot sa mga kanhing miyembro sa GKK nga anaa na sa layong dapit. Daghang salamat sa mga Mission Partners sa ilang pagkamanggihatagon alang sa live mass coverage. (Flor Arellano-Deloria | SoCCom, Holy Family Parish)