DADITAMA CLERGY: In communion with the Synodal Journey

Ang mga kaparian gikan sa upat ka Arkidyosesis sa subregion sa DADITAMA nagtigom sugod niadtong Abril 16, adlawng Martes hangtod Abril 18 didto sa Mergrande Ocean Resort ug St. Francis Xavier Regional Major Seminary alang sa DADITAMA CLERGY CONVENTION. Kini nga panagtapok kaniadto nang gisugdan matag tulo ka tuig apan kini naundang tungod sa pandemya. Karon dako ang pasalamat sa mga kaparian nga nahibalik kini tungod usa kini ka pamaagi sa ilang pakighimamat, pag-abiabi ug pagdugang sa ilang kahibalo isip mga ministro sa simbahan.

Sumala pa ni Fr. Edilberto “Loloy” Mahinay, Episcopal Vicar for the Clergy sa Dyosis sa Mati ug usa sa mga miyembro sa Steering Committee alang niining dakong panagtigom, “salamat sa Dios kay miabot na gyud kining adlaw” tuod man pila ka bulan kini nila nga gipangandaman. Sa gikaingon ni Fr. Loloy, ang pinakadaghan nga gituohang ihap sa mga delegado anaa sa 200. Ubay-ubay gayud kini nga numero tungod dili lang kini mga dyosisanong pari, apil usab ang mga relihiyoso.

Pagkanindot sa suporta nga gipakita labi na diha sa atong mga obispo, gani ang dyosis sa Mati pinaagi ni Most Rev. Abel Apigo, D.D. nagpagawas ug usa ka circular sa pag-awhag sa mga kaparian nga muapil gayud niining panagtigom. Sumala pa sa homiliya ni Most Rev. Romulo G. Valles, D.D. atol sa opening mass, siya miingon, “to see your presence, the presence of one another is already grace.” Diha sa iyang pagpamalandong iyang gitagaan ug gibug-aton ang kabililhon sa mga kaparian nga maoy instrumento sa pagkakaplag sa katawhan diha ni Jesus nga anaa sa pagpikas-pikas sa pan. Nanghinaot siya, nga tungod niining ilang tahas sulod sa Santos nga Eukaristiya, ang mga katawhan makakaplag ug mas makaila kang Jesus.

Si Reberendo Padre Nestor Morata nga gikan sa dyosis sa Mati miingon, “kini [nga panagtigom] usa ka pagpadayag nga kita nagpadayon niining panaw alang sa synodal nga simbahan.’’ Iyang gikahinaman ang mga panaghisgot sulod sa Theological Forum dili lang tungod sa mga hilisgutanan apan apil sab ang mga mamumulong ug mga reactors nga napili. Kini kuno, makadugang ug kahibalo kon unsa ang misyonaryong kasinatian dinhi sa Mindanao.

Sa duha ka adlaw nga panagtigom diha sa mga kaparian ug mga diyakono, sila mapuno ug mabusog diha sa mga pagtulon-an ug mga kasinatian uban ang matag usa tungod dili lamang mga kolokabildo ang ilang masinati apan apil usab ang mga dula nga mamahimo nilang kadaling pahulay sa ilang mga buluhaton.

Si Reberendo Padre Fernando “Nanding” Lariosa, Episcopal Vicar for the Clergy sa Dyosis sa Digos nalipay usab nga makaapil niini nga panagtigom. “Actually ang Ginoo, nag-ampo alang sa kahiusahan sa mga pari,” Tuod man kini nga aktibidad usa ka konkreto nga hitabo niining pagpakita sa kahiusahan ug mapdayunon nga pormasyon alang niining atong mga ministro sa simbahan.

Hinaot nga human niining pipila ka adlaw, manguli ang atong mga kaparian nga puno balik sa kadasig sa pagpangalagad sa mga katawhan ni Kristo aron sa ingon, sila makakita sa iyang panagway pinaagi diha kanila.