Panaw-Duaw Panahon Sa Kwaresma

Ang mga GKK Servant Leaders (GSLs) ug ubang miyembro sa Gagmay’ng Kristohanong Katilingban (GKK) sa Sta. Teresita, Green Orchard Village (G.O.V.), Cabantian, Davao City nagpahigayon og usa ka panaw-duaw panahon sa kwaresma niadtong Marso 16, 2024.

Una giadtuan ang St. Mary of the Perpetual Rosary Parish, Buhangin diin kami nahisakop ug nitambong sa alas 6:00 sa buntag nga Santos nga Misa. Pagkahuman sa Santos nga Misa miadto sa unom ka mga simbahan ang mga pilgrims diin didto gipahigayon ang Via Crusis: St. Francis of Assisi, Maa, Our Lady of Lourdes, Bangkal, Sto. Rosario, Toril, St. Joseph the Worker, Sta. Cruz, Davao del Sur, Divine Mercy Church, Digos City. Niduaw pud sa Mary Mediatrix of All Grace Cathedral, Digos City ug gihuman ang ika-14 ka estasyon sa Divine Mercy Shrine, Matanao, Davao del Sur.

Ang maong panaw-duaw adunay tulo ka tumong:

(1) Pag ila sa mga hiyas ni Jesukristo sa iyang pagka mahigugmaon ug pagka mapasayloon bisan paman sa atong pagka makasasala. Unta kini nga mga hiyas maoy mabatunan sa tanang sakop sa GKK Sta.Teresita G.O.V. ug sa tibuok katawhan nga nahisakop sa parokya sa St. Mary of the Perpetual Rosary Parish. (2) Mapamalandungan ang mga butang nga angay’ng buhaton ilabina sa panahon sa kwaresma sama sa (a) pag-ampo (b) pag-puasa (c) pag-hatag og limos sa mga nanginahanglan. (3) Alang sa kahiusahan sa mga GSL ug miyembro nga sakop sa GKK Sta.Teresita, G.O.V.

Panaw-duaw usa ka kalihukan aron sa pag-ampo ug pamalandong sa matag-usa isip mga piniyalan sa atong Ginoong Jesukristo sulod niining panahon sa kwaresma. Pagtahan sa kaugalingon sa pag-ampo, sakripisyo, pagserbisyo sa mga tawo nga nanginahanglan. Kini usa ka espiritohanong kalihukan aron sa pag bag-o sa kinabuhi. Pinaagi niini mabatunan unta ang kapasayloan sa mga sala nga nahimo ug sa wala pagtuman sa kabubut-on sa Dios. Unta mabatunan usab sa matag-usa ang mga hiyas sa pagka-mahigugmaon, pagka-mapailobon ug pagka-maggihatagon.

Malipayon ug mapasalamaton ang tanan sa kalampusan sa maong panaw-duaw. Bisan pa man sa kainit sa adlaw madasigon ang tanan sa pagsaka sa hagdan diin wala gibati’g kakapoy ug kaluya bisan pa sa mga edaran na apan abtik pa kaayong mihalad sa pag-ampo ug pagsalmot sa kalihukan diin ang uban nitunol og mga hinabang sa mga tao nga nanginahanglan nga ilang gikahinagbo sa matag simbahan nga naadtuan. Dako kaayo ang pasalamat sa mga pilgrims sa byahe nga malipayon, madasigon ug luwas nga walay mga kakulian. (Marlita Daro, OIC-PSK)