GKK sa Davao Empress, Dili Lamang Tagoan Kondili Ipaambit

Malipayon nga gisaulog ang ika-23 nga kapistahan sa GKK St. Joseph, Davao Empress, Panacan, sakop sa Parokya sa St. Francis Assisi sa Laverna niadtong Marso 19, 2024. Ang tema mao, “Katilingban nga Nagapanaw Uban ni Sr. San Jose Isip Maayong Piniyalan Malipayong Nagpadayon sa Misyon Diha sa GKK.”

Mabulokon nga gihimo ang mga kalihukan nga nakapadugang sa katilingbanon nga panagsuod. Pipila niini mao ang art and banting and cleanliness and beautification contest. Matod pa ni Arlene Intrepido, Pangulo sa Katilingban (PSK), adunay nabati ang lawom nga panaghiusa nga gani miingon ang usa sa mga sakop, “bahalag dili kadaug basta malipyon nga nagtrabaho sa among mga block.”

Sa iyang pagpalawom sa tema, si Fr. Pete Lamata, Kura Paroko, mipahimangno nga ang “pinakaimportanteng linya mao ang maayong piniyalan sama ni san Jose.” Siya nagkanayon nga ang “usa ka tawo nga matarong mopaambit sa mga gasa nga gihatag sa Dios.”

Matod ni Fr. Lamata, kinii usab ang hagit nga angay himuon sa matag usa alang sa “mga igsuon nga nanginahanglan og mas maayong pagtagad niining bulana sa Abril.” Kini subay sa atong pagsaulog sa ika-75 nga aniversaryo sa Arkidyosis sa Davao diin atong gihatagan og gibug-aton ang pagtagad alang sa mga kaigusuonan nato nga mas nanginahanglan og maayong pag-atiman.

Gidugang ni Fr. Lamata nga si San Jose isip ilang patron tawo nga matarong kay “ang iyang gibuhat mosidlak sa kahayag kay sayod siya unsay iyang buhaton bisan sa mga pagsulay. Ang iyang misyon mao ang pagkamaayong piniyalan sa Dios pinaagi sa pag-atiman kang Maria nga iyang asawa, nagsunod sa balaang kabubut-on sa Dios, nag-atiman kang Hesus. Si Jose instrumento sa kaluwasan.”

Gitapos ni Fr. Lamata ang iyang pagpaambit pinaagi sa pag-ampo kang Sr. San Jose: “Tabangi kami nga kining mga grasya nga nadawat namo, dili lang namo tagoan, kondili ipaambit sa uban labi pa sa mas nanginahanglan.”