FLA Symposium for Life

TEMA: “Paghigugma sa Kinabuhi: Sukaranan Alang sa Kaayohan sa Tanan.”

Malampusong gipahigayon ang kulminasyon sa Pro-Life Month Celebration nga gipasiugdahan sa Family and Life Apostolate (FLA) workers sa Archdiocese sa Davao. Kini gipahigayon sa Sta. Ana Shrine Parish, Conference Hall, Sta. Ana, ning syudad sa Dabaw ug gitambungan sa duha ka gatos ug napulo’g unom (216) ka mga partisipante sa FLA, nga gikan sa walo (8) ka bikaryato sa Archdiocese sa Davao.

Gisugdan ang maong Pro-Life Culmination sa pagrosaryo, nga gipanguluhan sa host parish, ang Sta. Ana Parish FLA Group ug gisundan kini sa gihan-ay nga pag-ampo nga gihatag sa St. Mary of Perpetual Rosary Parish FLA Group. Mainiton nga mihatag si Rev. Fr. Jose Junar dela Victoria, Parish Priest sa Sta. Ana Shrine Parish, sa iyang welcome address sa tanang mitambong sa panagtigom, ug sumala kaniya, malipayon siya nga ang ilang parokya ang nahimong host parish sa maong panagtigom, uban sa gamay nga pagpasabot bahin sa devotion kang Sta. Ana nga inahan ni Santa Maria–nga inahan sa atong Ginoong Jesukristo.

Adunay duha ka resource speakers sa maong symposium. Una, mao si Dra. Gilda Cunanan Del Mar, nga mihatag sa pagpasabot ug pagpalawom sa unsa ang pagka-mahinungdanon sa paghatag og bili sa kinabuhi. Siya nagpasabot niini, “isip usa ka bugno sa kinabuhi diha sa pagtoo, kaminyuon, ug pamilya.” Nga ang katuyoan sa kaminyoon, mao ang “unitive” kon panaghiusa ug “pro-creative” kon ang pagsanay ug paghimo og usa ka pamilya tungod kay “A child is not a choice, it is a God-given gift”. Iyang gipasabot nga mamahimong abli sa kinabuhi ug musangyaw sa Ebanghelyo sa kinabuhi.

Misunod mao si Dra. Eleanor de Borja Palabyab sa tema nga Culture of Life vs. Culture of Death, diin sya nagpasabot sa kahulugan sa acronym nga DEATH – Divorce, Euthanasia, Abortion, Total Infertility, ug Homosexuality. “Science and Faith are not in conflict”, matud pa niya.

Usa ka dakong hagit diha sa matuod nga pagpangalagad mao nga ampingan ang kinabuhi “FROM WOMB TO TOMB”.

Gitapos ni Rev. Fr. Orlando A. Angelia, ang maong symposium pinaagi sa paghatag ug hamubo nga pagpalawom kung unsa ang pagka “PRO-LIFE”.

P – Prayerfulness, a God-centered family
R – Respect for others
O – Obedience to God
L – Letting God’s will be our guide
I – Informed Conscience
F – Fidelity to God’s plan for marriage/family
E – Entrust everything to God’s mercy

Ug natapos ang maong Culmination sa alas 11:45 sa buntag, baon ang mga makabuluhang pagpahinumdum sa matag FLA worker sa Arsidyosis sa Davao. (Ellen S. Jamili & Leticia M. Tutor)