Bisita Pastoral 2024 (Part 2 of 2)

Ang ikaduhang adlaw sa bisita pastoral ni Arsobispo Romulo G. Valles, D.D. gitagana alang sa mga kabatan-onan sa parokya. Gisugdan gihapon kini og Santos nga Misa nga siya mismo ang nagsaulog kauban ang kura paroko nga si Father Jojo Ortiz. Sumala pa niya na malipayon siya nga makakita sa kadaghan sa mga kabatan-onan sa Mandug. Nagsugod ang Interaction with Archbishop sa mga batan-on sa alas 7:30 sa gabii. Gisugdan ang programa ug recorded invocation prayer ni Father Ortiz kauban ang Koro San Alfonso. Gisundan dayon kini ug mga pasundayag sa Parish Youth Apostolate core group ug Parish Youth Ushers. Human sa pasundayag mao na ang mga Q and A portion with the Archbishop. Nagkadaiya ang mga pangutana sa batan-on, una sa mga pangutana ang pagpangamusta sa Arsobispo nga iyang gitubag usab nga siya maayo, gikapoy gamay apan malipayon. Sunod nga pangutana mao ang unsa ang iyang advise sa mga kabatan-onan nga nagduha duha sa ilang tinuohan. Sigon sa Arsobispo nga dili dapat dayon sila mataranta while naga pangutana sila, dungag pa niya nga maayo na maguide-an sila kung asa sila manguha sa ilang mga tubag. Iyang gi saysay nga sa Bibliya daghan kaayog makita nga character ug mga mabasa mahitungod sa pagduha-duha sa pagtoo. Aduna usab pangutana mahitungod sa LGBTQ members nga naga serbisyo sa simbahan ug ingon man sa mga LGBTQ members na ilang paminaw na ginasalikway sila sa simbahan. Ang una niyang tubag niya mao “Please stay kay, please stay kay daghan man mog mabuhat sa simbahan, even though gay imong disposition, stay and contribute and continue sharing yourself sa kinabuhi sa simbahan” dungag pa niya na “kung adunay cases na nabati nila na gina salikway sila, please know nga as of today that is not what is supposed to na among buhaton, dapat ang simbahan: accepting, patient and dli musalikway sa LGBT”. Sumala pa kay Archbishop Valles na grabe ang mga pangutana sa mga batan-on, imbes daw gikapoy siya nawala kuno ang iyang kakapoy. Gitapos ang event ug panalangin nga gihatag sa Arsobispo ngadto sa mga kabatan-onan. Nag apod-apod usab ug mga rosaryahon alang sa mga nanambong nga batan-on.

Ang ulahing adlaw sa iyang bisita pastoral gitagana alang sa pakighimamat sa Parish Finance Council ingon man Church Construction and Maintenance Committee o CCMC. Pagkahuman sa iyang pakighimamat kanila nidiretso dayon si Archbishop sa GKK San Miguel sa Upper Swadan Brgy. Callawa usa sa mga layo nga GKK Chapels nga sakop sa parokya sa Mandug. Gisugat siya sa mga katawhan sa mga malabyan nga GKK padulong sa venue ug mga banderitas, wala nila igsapayan ang kainit sa panahon makita lamang nila ang amahan sa arsidayosis sa Davao. Pag-abot sa border sa Mandug – Callawa gisugat siya sa mga katawhan uban ang banda ug mga kapulisan. Nakasakay siya sa iyang salakyan samtang gapa amen sa mga katawhan nga miduol sa iyang sakyanan mga bata ingon man mga tiguwang, mga ginikanan nga nagbitbit sa ilang mga anak. Aduna usab laing pundok sa mga katawhan nga naglaray sa kadalanan sa Centro Callawa aron masaksihan mismo sa ilang mga mata ang espesyal nga bisita na ilang gina hulat. Makita kaayo sa mga panagway sa katawtahan ang ilang kalipay nga makita ang arsobispo nga mibisita sa ilang lugar. Nagsugod ang Santos nga Misa sa GKK San Miguel Upper Swada alas 10 kapin sa buntag. Sa iyang homiliya iyang gipasalamatan ug dako ang katawhan sa Callawa sa mainiton niining pagdawat kaniya bisan paman sa kainit sa panahon, nalipay kuno siya pagayo sa iyang mga nakita. Puno ang kapilya ug mga tao ingon man ang gawas niini kung asa aduna pay nangyaka sa kasagbutan para lang makatambong sa Santos nga Misa. Pagkahuman sa Misa adunay gi andam nga salo-salo ang mga lideres sa maong kumunidad, higayon usab nga nakahimamat niya ang mga lideres sa maong GKK. Sa katapusan nagpasalamat ang kura paroko sa San Alfonso nga si Father Jemasol Ortiz sa tanang mga mitabang nga mahimong magmalampuson ang maong bisita pastoral sa atong halangdong Arsobispo, ingon man kaniya sa oras ug panahon nga iyang gigahin nga mabisita ang parokya sa Mandug. (Jomar Earl Narciso | SoCCom)