Ang balaanong paghinumdum panahon sa kwaresma

Ang Parish Lenten Recollection sa St. Mary of the Perpetual Rosary Parish, Buhangin gipahigayon niadtong Marso 13-14, 2024. Gipaambit ni Rev. Angelo Espinas sa unang adlaw mao ang “For our sake He was Crucified under Pontius Pilate”, gihatagan kini og pagpadayag nga sugo ni Poncio Pilato ang paglansang kang Jesus. Gipalabi niya ang pagtuman sa Jewish tradition. Ang iyang pagbudhi dili makalimtan ug nagpabilin tatak sa kasaysayan. Kita Kristohanong magtotoo mitubo isip piniyalan nagserbisyo sa Ginoo ngadto sa kaigsoonan. Angayan ba kita niini? Nga diha sa atong kahibalo dili kita mahisama ni Poncio Pilato.

Ang Ginoong Jesus wala magpahimulos sa Iyang pagkatalagsaong Anak sa Dios kondili nagpasakit, gibudhi-an, gipas-an ang krus, nag-ula sa dugo, gihaum Kaniya ang koronang tunok. Naghalad Siya sa Iyang kaugalingon alang sa kaluwasan sa tanan apil ang kasakit nga dili matupngan ug ang Iyang tiunay nga Gugma hangtud sa kahangturan. Ug diha sa atong paglawig mao ang tumong niining tanan.

Sa ikaduhang yugto sa pahinumdum gipalawom ni Rev. Angelo Espinas kini – “Release Barabas”, ang pagpasaylo sa nakasala sakit palandungon, si Jesus Nazareno ang nagtubos niining tanan. Kita ba kaha makabuhat niini? Asa na ang atong pagpasaylo? Ang mga kalisdanan sa atong kinabuhi usahay makapaluya sa atong kahimtang, atong batunan ang pagkamaayo sa atong Amahan pinaagi sa atong Ginoong Jesukristo ang pagbuntog sa kadautan adunay katumanan. Atong tun-an atong kaugalingon nga magpuyo sa pagpaubos, tiunay’ng binuhatan ug pagpasaylo ug mapasalamaton sa grasyang makasantos isip mga piniyalan sa Ginoo ngadto sa katilingban; pagdayeg, pagbalaan sa Santos nga Eukaristiya nga buhi alang kanato.

Mapasalamaton kami sa among Kura Paroko, Rev. Fr. Dionisio Tabiliran sa pagpaambit sa sekreto sa pagbuntog sa kadautan sama sa garbo ug kahakog. Mao nga ipatigbabaw nato ang atong tiunay’ng pagtoo, hugot nga pag-ampo ug paghigugma sa kaigsoonan. Ang pagsulay dili makatandog kay ang Ginoo anaa kanunay sa atong kiliran.

Daghang Salamat Rev. Angelo Espinas sa imong mga mensahe ilabina sa pag-ampo, pag-ampo ang kalig-on niining tanan. Dalaygon ang Dios sa Kahimayaan. Ginoong Jesukristo, kaloy-i kami. (Maria Dexie Calvo, GKK SoCCom)