Sinudanhong Simbahan uban ni Virgen delos Remedios

Sa dakong pagsalig sa Ginoo ug sa debosyon sa Mahal nga Birhen Maria gidungog ang mga pangaliyupo ug pag-ampo sa mga parokyano sa Virgen delos Remedios. Nagmalampuson ang prusisyon sa 75 ka GKK nga nagdala og patron sa nagkadaiyang katilingban, uban sa Virgen delos Remedios nga wala nakahiagom og ulan hangtod nahuman ang Santos nga Misa. Matod pa ni Monsignor Julius Rodulfa atol sa alas 8:30 sa buntag nga fiesta mass, bisan gakisdom ang panahon apan ang kahayag sa panagway sa simbahan ang misugat kaniya sa iyang pag-abot. Maanindot ug hayag sa panglantaw ang tibuok parokya. Dugang pa niya nga sa Pebrero 2 gisaulog nato ang Candelaria nga adunay pagbendisyon sa mga kandila sa panahon sa Santos nga Misa dungan usab sa pagsaulog sa paghalad sa Mahal nga Birhen sa Batang Jesus ngadto sa templo. Si Jesus maoy tinuod nga kahayag ug tinubdan sa kahayag ngadto sa tanang katawhan. Iya usab gidayeg ang tema nga haum kaayo sa kasamtangang gipalapnag sa simbahan. Ang tema: “Virgen delos Remedios, kauban sa nagpadayon natong panaw padulong sa sinudanhong simbahan ug modelo sa pagpuyo sa pagkapiniyalan sulod sa atong mga GKK ug mga banay.”

Human sa Santos nga Misa gisunod dayon ang mga parlor games ug presentasyon nga gisalmotan sa 6 ka distrito. Sadya ang tanan tungod kay nag-gahin ug mga papremyo ang among Kura Paroko nga si Fr. Anthony “Don” Silvosa. Nagpasalamat sa tanan si Fr. Don tungod kay nagmabulukon ang pagsaulog sa ika-13 katuig nga kapistahan sa Virgen delos Remedios. Apan nasubo ang tanan sa dihang pag-ingon ni Fr. Don nga katapusan na karon tuiga nga makig-uban siya kanamo. Agig pagpasalamat ni Fr. Don sa tanang mga GSL iyang gisorpresa ang 6 ka distrito sa 6 ka lechon nga iyang gihatag sa matag distrito. Natapos ang selebrasyon nga nakigduyog gayod ang langit sa maong selebrasyon. Viva Hesus! Viva Maria! (Lilibeth Sancover | VDLR Parish SoCCom)