Singkwenta ka tuig nga panaghiusa uban sa gugma

Niadtong 1973 pag-abot sa pamilya ni Bonifacio Sabate, nakapalit kini og luna gikan sa mga Lumad dinhi sa Sitio Balagbag, Malabog. Sa maong tuig usab miabot ang pamilya ni Felix Bornia nga dunay debosyon sa Sr. Santo Niño sa ilang panimalay. Tungod sa ilang mga anak nga nagkaminyoay ug aduna na silay suod nga relasyon ug pinaagi sa panagsabot sa duha ka pamilya nga maghimo sila’g gamay nga kapilya, diha-diha dayon si Bonifacio Sabate midonar og luna aron katukoran sa kapilya nga 15 hangtod 30 metros kwadrado ang gilapdon. Ang tanang lumulopyo sa maong lugar nagkauyon gayod nga magtukod sila og kapilya.

Sa unang piyesta sa tuig 1974 ang atop inak-ak ug tabla ang bongbong niini. Ug ilang nauyonan nga ipadayon ang nasugdan na nga pagdebosyon sa pamilyang Bornia ngadto kay Sr. Santo Niño. Unang Pangulo Sa Liturhiya (PSL) niini nga katilingban mao si Alfredo Sabate ug Diosdado Daydayan, inubanan sa ubang mga ministriya. Sa Parokya sa San Juan Magbubunyag sa Lasang pa sila nahisakop niadtong panahona.

Niadtong Enero 23, 2024, gisaulog ang ilang ika-singkwenta ka tuig nga kapistahan kon Golden Fiesta Celebration. Karon kini gidumala sa ilang Pangulo Sa Katilingban (PSK) nga si Mario C. Regidor. Siya mapasalamaton sa tanang mga kaubanang pangulo sa ministriya sa katilingban ug sa ilang mga miyembro aron mahimong malampuson ang ilang pagsaulog sa kapistahan.

Gisugdan ang Santos nga Misa sa alas 9 sa buntag nga gipangulohan ni Rev. Fr. Cirilo Bermudez, administrator sa San Roque Parish, Malabog. Ang iyang homilya naglangkob sa Batang Jesus nga ang tanang miyembro sa katilingban magmalig-on unta sa pagtoo, ug magpadayon sa pagsimba sa adlaw nga Dominggo, maghiusa aron molambo ang pagtoo sa Ginoo. Ang Batang Jesus, maalagaron, maampoon ug mahigugmaon. Magkahiusa unta ang tanan alang sa kaayohan pinaagi sa pagbuhat og maayo.

Viva Sr. Santo Niño! Dalaygon ang Batang Jesus!

(Arlene Tarnate ug Nilda Regidor | SRP-Malabog)